पहिलो त्रैमासिकमा वाणिज्य बैंकहरूको खुद ब्याज नाफा साढे ४९ अर्ब

काठमाडौं– तरलता अभावका कारण बैंक तथा वित्तीय संस्थाले ब्याजदर (कर्जा र निक्षेप) बढाएपछि यतिबेला देशभरका उद्योगी व्यवसायी विरोधमा छन्। कर्जाको ब्याजदर घटाउन नियामकले पहल गर्नुपर्ने भन्दै उनीहरूले निरन्तर दबाब दिइरहेका छन्।

वाणिज्य बैंकहरूले कर्जाको ब्याजदर १८ प्रतिशतसम्म पुर्‍याएपछि उद्योगी तथा व्यवसायी आन्दोलित भएका हुन्। गत वर्षको तुलनामा यस वर्ष तिर्नुपर्ने ब्याज दोब्बर भएपछि उनीहरूले यसको समाधान तत्काल हुनुपर्ने माग गर्दै आएका छन्।

राष्ट्र बैंकका अनुसार गत आर्थिक वर्षको पहिलो दुई महिनामा कर्जाको ब्याजदर औसत ८.५७ प्रतिशत रहेकामा चालू आवको सोही अवधिमा १२.०६ प्रतिशत पुगेको छ, जुन ३.४९ प्रतिशत बिन्दुले बढी हो।

तर ब्याजदर वृद्धिले वाणिज्य बैंकको खुद नाफामा भने सकारात्मक प्रभाव देखिएको छ। वाणिज्य बैंकहरूले प्रकाशित गरेको चालू आवको पहिलो त्रैमासिकको वित्तीय विवरणअनुसार खुद ब्याज नाफा २८.४४ प्रतिशतले बढेको छ। वाणिज्य बैंकहरूले चालू आवको त्रैमासमा ४९ अर्ब ६२ करोड ४३ लाख ९० हजार ब्याज नाफा आर्जन गरेका छन् भने गत आवको सोही अवधिमा यस्तो नाफा ३५ अर्ब ६५ करोड ८६ लाख ७८ हजार थियो।

चालू आवको समीक्षा अवधिमा सबैभन्दा बढी ब्याजबाट नाफा आर्जन गर्नेमा नबिल बैंक अगाडि छ। बैंकले यस अवधिमा ३ अर्ब ६७ करोड ७१ लाख ७९ हजार ब्याजबाट नाफा आर्जन गरेको छ। गत आवको सोही अवधिमा नबिल बैंकको ब्याज नाफा २ अर्ब २४ करोड १५ लाख २७ हजार थियो। 

ब्याजबाट बढी नाफा आर्जन गर्नेमा एनआइसी एसिया बैंक दोस्रो र ग्लोबल आईएमई बैंक तेस्रो नम्बरमा छन्। यी दुई बैंकले असोज मसान्तसम्म क्रमशः ३ अर्ब ४१ करोड ४ लाख ९६ हजार र ३ अर्ब २० करोड २७ लाख चार हजार खुद ब्याजबाट नाफा कमाएका छन्। 

राष्ट्रिय वाणिज्य बैंकको खुद ब्याज नाफा ३ अर्ब १८ करोड ३८ लाख ९९ हजार छ। नेपाल इन्भेष्टमेन्ट बैंक, सिद्धार्थ बैंक र एनएमबी बैंकले क्रमशः २ अर्ब १२ करोड ९५ लाख, २ अर्ब १२ करोड ८५ लाख र २ अर्ब ५ करोड ४२ लाख ब्याजबाट नाफा आर्जन गरेका छन्। 

प्रभु र कुमारी बैंकले १ अर्ब ९७ करोड कमाएका छन् भने नेपाल बैंकले १ अर्ब ९० करोड खुद ब्याजबाट नाफा गरेको छ। एभरेस्ट बैंक र प्राइम कमर्सियल बैंकले १ अर्ब ८८ करोड ब्याज नाफा आर्जन गरेका छन्।

कृषि विकास बैंकले १ अर्ब ८३ करोड, हिमालयन बैंकले १ अर्ब ८० करोड र मेगा बैंक १ अर्ब ७९ करोड खुद ब्याज नाफा आर्जन गर्न सफल भएका छन्।

समीक्षा अवधिमा सानिमा बैंकको ब्याज नाफा आर्जन १ अर्ब ६० करोड छ भने लक्ष्मी बैंकको १ अर्ब ५१ करोड छ। माछापुच्छ्रे, सिटिजन्स र सन्राइज बैंकको ब्याज नाफा क्रमशः १ अर्ब ४७ करोड, १ अर्ब ४५ करोड र १ अर्ब ४३ करोड छ। 

स्ट्यान्डर्ड चार्टर्ड बैंकले १ अर्ब ४१ करोड, नेपाल एसबीआई बैंकले १ अर्ब २९ करोड, बैंक अफ काठमाण्डूले १ अर्ब २२ करोड, सिभिल बैंकले १ अर्ब १५ करोड र एनसीसी बैंकले १ अर्ब १२ करोड खुद ब्याज नाफा गरेका छन्।

त्यसैगरी सेञ्चुरी कमर्सियल बैंकले सबैभन्दा कम १ अर्ब ७ करोड ६२ लाख ४१ हजार खुद नाफा आर्जन गरेको छ ।

समीक्षा अवधिमा सबैभन्दा बढी ब्याज नाफा बढाउनेमा एभरेष्ट बैंक छ। एभरेष्ट बैंकले गत आवको तुलनामा चालू आवको समीक्षा अवधिमा ४२.९ प्रतिशतले ब्याज नाफा बढाएको छ। त्यस्तै, लक्ष्मी बैंकले ४१.३ प्रतिशत, नेपाल इन्भेष्टमेन्ट बैंकले ३९.९४ प्रतिशत र नबिल बैंकले ३९.४ प्रतिशतले ब्याज नाफा बढाएका छन्।

राष्ट्र बैंकका अनुसार वाणिज्य बैंकहरूको औसत आधारदर २०७८ भदौमा ६.८९ प्रतिशत रहेकामा २०७९ भदौमा १०.१ प्रतिशत छ। २०७९ भदौमा वाणिज्य बैंकहरूको निक्षेपको भारित औसत ब्याजदर ७.८१ प्रतिशत र कर्जाको भारित औसत ब्याजदर १२.६ प्रतिशत छ।