घाँस काट्न सँगै जंगल गए, श्रीमतीको हत्या गरी प्रहरीकोमा पुगे

अर्घाखाँची- अर्घाखाँचीको मालारानी गाउँपालिका–२ डाडाकटेरीमा एक पुरुषले श्रीमतीको हत्या गरेका छन्। 

शुक्रबार दिउँसो साढे २ बजे मालारानी–२ डाडाकटेरीका २७ वर्षीय कमल भुसालले गम्छाले घाँटी कसेर २७ वर्षीया सरु भट्टराई भुसालको हत्या गरेका जिल्ला प्रहरी कार्यालय अर्घाखाँचीका प्रहरी निरीक्षक अर्जुन पौडेलले जानकारी दिए।

दुई जना घरबाट नजिकैको जंगलमा घाँस दाउरा लिन भनी सँगै गएको र आफूले कम्मरमा बाँधेको गम्छाले श्रीमतीको घाँटी कसेर मारी नजिकैको खोल्सीमा स्याउलाले ढाकेर ‘श्रीमतीको हत्या गरेँ’ भनी भुसाल आफैं इलाका प्रहरी कार्यालय गएका थिए।

हत्याको कारण खुलेको छैन। प्रहरी निरीक्षक पौडेलका अनुसार घटनाका बारेमा अनुसन्धान भइरहेको छ।