हिन्दू, बौद्ध र किरातको संख्या घटेको हल्ला प्रष्ट पार्न कमल थापाको माग

काठमाडौं- राप्रपा नेपालका अध्यक्ष कमल थापाले २०७८ सालमा भएको पछिल्लो जनगणनामा हिन्दू, बौद्ध र किराँत धर्मावलम्बीहरुको संख्या निकै घटेको हल्ला भएकाले त्यसको सत्यतथ्य सार्वजनिक गर्न सरकारसँग माग गरेका छन्।

थापाले विज्ञप्ति जारी गर्दै धर्म परिवर्तनको डढेलोमा सनातन धर्म (हिन्दू, बौद्ध र किराँत) संस्कृति र परम्परा कमजोर हुँदै गएको तथा लोभलालच, प्रलोभन, भ्रम र त्राश सिर्जना गरी योजनाबद्ध रुपमा धर्म परिर्वतन भइरहेको दाबी गरेका छन्।

संगठित रुपमा धर्म परिवर्तन गराउने काम भैरहेकोबारे राप्रपा नेपालले बारम्बार आवाज उठाउँदै आएको भन्दै उनले धर्मनिरपेक्षताको आडमा धर्मपरिवर्तन गर्न गराउन पश्चिमा मुलुकहरूले करोडौं डलर लगानी गरिरहेकोसमेत आरोप लगाएका छन्। ‘केही प्रमुख दलहरुले धर्मपरिवर्तनलाई संरक्षण प्रदान गरिरहेका छन्,’ उनको आरोप छ,  ‘राष्ट्रको पहिचान र एकताको आधार कमजोर बनाउने षड्यन्त्र भैरहँदा नागरिक समाज, बुद्धिजीवी वर्ग र आमसञ्चार माध्यमहरू उदासीन रहनु उदेकलाग्दो छ।’

उनले सनातन धर्म संस्कृति र परम्पराको रक्षाका निम्ति अब संघर्षमा उत्रनुबाहेक अर्को विकल्प नभएको भन्दै सनातन धर्म संस्कृतिका पक्षधर धार्मिक संस्था, स्वामी, गुरु, पण्डित, पुरोहित र आमजनतालाई संयुक्त र एकतावद्ध संघर्षको तयारीमा जुट्न आह्वान गरे।