अख्तियारका घूस लिने पूर्वआयुक्त पाठक र दिने न्यौपाने दोषी ठहर

काठमाडौं- विशेष अदालतले अख्तियार दुरुपयोग अनुसन्धान आयोगका पूर्वआयुक्त राजनारायण पाठकलाई भ्रष्टाचार अभियोगमा दोषी ठहर गरेको छ। घूस लिएको अभियोगमा अख्तियारले आयुक्तविरुद्ध विशेष अदालतमा मुद्दा दायर गरेको थियो। सो मुद्दामा बिहीबार उनी दोषी ठहर भएका हुन्।

पाठकलाई ३९ लाख रुपैयाँ जरिवाना तोकिएको छ। उनीसँगै घूस काण्डमा जोडिएका लम्बोदर न्यौपानेलाई पनि अदालतले दोषी ठहर गर्दै ३९ लाख जरिवाना र तीन वर्ष कैद सजाय सुनाएको छ। विशेष अदालतका प्रमुख श्रीकान्त पौडेल, न्यायाधीशहरु यमुना भट्टराई र बलभद्र बाँस्तोलाको इजलासले उनीहरुलाई दोषी ठहर गरेको हो।

न्यौपाने नेपाल इन्जिनियरिङ कलेजका पूर्वअध्यक्ष हुन्। पूर्वआयुक्त पाठकले सो कलेजको सम्बन्धन विवादमा न्यौपानेसँग ७८ लाख रुपैयाँ घूस मागेको अडियो सार्वजनिक भएको थियो। अडियो सार्वजनिक हुँदा पाठक बहालवाला आयुक्त थिए। त्यसपछि उनी फरार भएका थिए। पाठकलाई विशेष अदालतले थप ३ महिनाको कैद सजायसमेत सुनाएको छ। यो सजाय अख्तियारको आयुक्त भएर पनि भ्रष्टाचार गरेबापतको हो।