ऐना पहरालाई पर्यटकीय गन्तव्य बनाइँदै

तनहुँ- आँबुखैरेनी गाउँपालिका कार्यालयले पृथ्वीराजमार्ग खण्डमा पर्ने ऐना पहरालाई पर्यटकीय गन्तव्य बनाउन लागेको छ। आँबुखैरेनी वडा नम्बर २ र ४ को सिमानामा रहेको ऐना पहरामा ऐना पार्क बनाएर पर्यटन प्रवर्द्धन गर्न लागिएको हो। 

चालू आर्थिक वर्षमा रु एक करोड ४० लाख विनियोजन गरेर आकर्षक पार्क बनाउन लागिएको गाउँपालिकाका अध्यक्ष शुक्र चुमानले जानकारी दिनुभयो। बहुबर्षीय योजनाअन्तर्गत गाउँपालिकाको आफ्नै स्रोतमा साहसिक खेल, सिसाको ब्रिज, जीपलाइन, स्विमिङ पुल, ढुङ्गामा आर्कषण मूर्ति निर्माणलगायतका संरचनाका लागि डिपिआर गरी प्रक्रिया अघि बढाइएको उनले बताए। 

कूल पाँच करोड लाग्ने अनुमानअनुरूप गौरवको आयोजनामा राखेर काम गर्न लागेको गाउँपालिका कार्यालयले जनाएको छ। पृथ्वीराजमार्ग भएर दैनिक सयौं सवारीसाधन गुड्ने हुँदा पर्यटकलाई आर्कषण गर्न सकेको अवस्थामा आयआर्जन गर्न सकिने प्रचूर सम्भावना देखिएको छ। 

त्यसैगरी गाउँपालिकाले वडा नम्बर ६ को हिले खर्क र वडा नम्बर १ को गिरौनचौरलाई नमूना पर्यटकीय गाउँ घोषणा गरी बजेट विनियोजन गरेको छ। दुई वडाका गाउँलाई तीस लाखका दरले साठी लाख बजेट विनियोजन गरेर प्रक्रिया अघि बढाइएको छ। कार्यविधि बनाएर मौलिक प्रकृतिका घरको संरक्षण गरिने अध्यक्ष चुमानले जानकारी दिए। 

उक्त स्थानमा अब बन्ने घर पनि मौलिक किसिमका हुनेछन्। उनले भने, 'त्यहाँ रहेका घुमाउने घर गुरुङ समुदायको कलासंस्कृति पर्यटकका लागि आर्कषण बन्न सक्ने विश्वास गरेका छौं।'