शीर्ष नेताविरुद्ध 'नो नट अगेन'को प्रचार गरे लाख जरिवाना र ५ वर्ष कैदको चेतावनी

काठमाडौं- शीर्ष नेताको फोटो राखेर ‘नो भोट अगेन’को प्रचार गरे ५ वर्षसम्म कैद गर्न सकिने भन्दै निर्वाचन आयोगले चेतावनी दिएको छ। मंगलबार विज्ञप्ति जारी गर्दै आयोगले त्यस्तो प्रचार गर्नेलाई १ लाख रुपैयाँ जरिवाना वा दुवै सजाय हुने चेतावनी दिएको हो। 

‘निर्वाचनको लागि दलहरूको उम्मेदवारी दर्ता भइसकेको सन्दर्भमा  'नो, नट अगेन'का फेसबुक पेज/ग्रुपहरूबाटउम्मेदवार रहेका दलका नेताहरूबारे विभिन्न लाञ्छनापूर्ण अभिव्यक्ति तथा भ्रामक र द्वेषपूर्ण श्रव्य/श्रव्यदृश्य सामग्री प्रकाशन गरेकोप्रति हाम्रो गम्भीर ध्यानाकर्षण भएको छ,’ आयोगले चेतावनी दिएको छ, 'उल्लेखित कसुर गर्ने व्यक्तिहरूलाई एक लाख रुपैयाँसम्म जरिवाना वा पाँच वर्षसम्म कैद वा दुवै सजाय हुने व्यवस्था रहेको हुँदा झुठा फेसबुक पेज /ग्रुपहरू तत्काल हटाई उप्रान्त यस किसिमका गतिविधि नगर्न सम्बन्धित सबैलाई जानकारी गराइन्छ।'

प्रधानमन्त्री एवम् नेपाली कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एमालेका अध्यक्ष केपी शर्मा ओली, नेकपा एसका अध्यक्ष माधवकुमार नेपाल, सोही दलका नेता झलनाथ खनाल र नेपाल समाजवादी पार्टीका अध्यक्षसमेत रहेका डा बाबुराम भट्टराईको फोटो राखेर पुन: जिताउन नहुने भन्दै सामाजिक सञ्जालमा 'नो नट अगेन' अभियान चलाइँदै आएको छ।