८८१ मतदाताले चुन्नेछन् नयाँ राष्ट्रपति

काठमाडौं– निर्वाचन आयोगले तयार पारेको मतदाता नामावलीका अनुसार आगामी २५ फागुनका लागि तय भएको नयाँ राष्ट्रपति निर्वाचनमा ८८१ मतदाता रहने भएका छन्।

प्रतिनिधिसभाका २७५ मध्ये चितवन २ बाट निर्वाचित रवि लामिछाने पदमुक्त भएका र मनाङबाट निर्वाचित टेबहादुर गुरुङ निलम्बनमा परेका कारण मतदान गर्न पाउने छैनन्। महोत्तरी १ बाट निर्वाचित प्रतिनिधिसभा सदस्य लक्ष्मी चौधरी कोइरीले मतदान गर्न पाउने/नपाउने भन्नेबारे आयोग निर्णयमा पुगिसकेको छैन।

आयोगका प्रवक्ता शालिग्राम शर्मा पौडेलले यस पटकको राष्ट्रपति निर्वाचनमा तीन जना मतदाता कम हुन सक्ने बताए। उनले भने, ‘तीन जना मतदाता कम हुन सक्छन्। यसबारे बुधबार आयोगले निर्णय गरेर सार्वजनिक गर्छ।’

राष्ट्रपति निर्वाचन तालिकाअनुसार आयोगले बुधबार मतदाता नामावली प्रकाशन गर्नेछ। त्यसपछि उजुरीमाथि छानबिन ११ र १२ फागुनमा हुनेछ। अन्तिम मतदाता नामावली १२ फागुनमै प्रकाशन गरिनेछ। 

बानेश्वरस्थित संघीय संसद् भवन परिसरमा राष्ट्रपतिको निर्वाचन गर्न आयोगले निर्वाचन अधिकृतको कार्यालय स्थापना गरेको छ। राष्ट्रपति उम्मेदवारको मनोनयन दर्ता १३ फागुन र २५ फागुनमा निर्वाचन हुनेछ। हलका राष्ट्रपतिको कार्यकाल २९ फागुन र उपराष्ट्रपतिको ३ चैतमा सकिँदै छ।