सांसद अरुण चौधरीको नाम मतदाता नामावलीमा चढाउन निवेदन

काठमाडौं– निर्वाचन आयोगले २५ फागुनका लागि तय गरेको राष्ट्रपतिको निर्वाचन कार्यतालिकाअन्तर्गत मतदाताको नामावलीमा दाबी विरोध गर्न तोकिएको अन्तिम म्यादसम्म पाँच वटा निवेदन परेका छन्।

तीमध्ये चार वटा नाम सच्याउने र एउटा नाम समावेश गर्ने विषय रहेको सहायक निर्वाचन अधिकृत अमृता शर्माले बताएकी हुन्। 

आज अपराह्न १२ बजेसम्म मतदाता नामावलीमा दाबी विरोधका लागि समय तोकिएको थियो। कैलाली क्षेत्र २ बाट निर्वाचित नागरिक उन्मुक्ति पार्टीका सांसद अरुणकुमार चौधरीको नाम मतदाता नामावलीमा समावेश गर्न निवेदन परेको छ। अन्य चार वटा निवेदन भने नाम सच्याउने विषयमा रहेको निर्वाचन अधिकृतको कार्यालयले जनाएको छ।

मतदाता नामावलीको दाबी विरोधमा भने कुनै निवेदन दर्ता नभएको बताइएको छ। प्राप्त निवेदनका सम्बन्धमा छलफल गरी निर्वाचन अधिकृतको कार्यालयले शुक्रबार अपराह्न १२ बजे राष्ट्रपतिको निर्वाचनका लागि मतदाताको अन्तिम नामावली प्रकाशन गर्नेछ।

राष्ट्रपति निर्वाचित गर्न संघीय संसद्का सांसद र प्रदेशसभा सदस्यले मतदानको अधिकार रहेको हुन्छ। मतदान २५ फागुनमा संसद् भवन नयाँ बानेश्वर परिसरमा हुनेछ।