चुनावमा हेलिकोप्टर प्रयोगबारे अनुसन्धान गर्न अख्तियारलाई अनुरोध

काठमाडौं- निर्वाचन आयोगले मंसिर ४ गते हुने प्रतिनिधि सभा सदस्य तथा प्रदेशसभा सदस्य निर्वाचनको प्रचारप्रसारका क्रममा हेलिकोप्टरलगायत सरकारी स्रोत साधनको दुरुपयोगबारे अनुसन्धान गर्न अख्तियार दुरुपयोग अनुसन्धान आयोगलाई अनुरोध गर्ने भएको छ। आयोगले सोमबार जारी गरेको विज्ञप्तिमा हेलिकोप्टरलगायत सरकारी साधन स्रोतको दुरुपयोग गर्न रोक लगाइएको विषय स्मरण गराइएको हो। 

'हेलिकोप्टर लगायतका सरकारी साधनको उपयोग भएको विषयमा आवश्यक निगरानी तथा अनुसन्धान गरिदिन अख्तियार दुरुपयोग अनुसन्धान आयोगलाई अनुरोध गरी पठाउने' आयोगले गरेको निर्णयमा उल्लेख छ।

आयोगले प्रधानमन्त्री तथा मन्त्रिपरिषद्को कार्यालयमार्फत नेपाल सरकारका मन्त्रीलाई तथा मुख्यमन्त्री तथा मन्त्रिपरिषद्को कार्यालयमार्फत् प्रदेश सरकारका मन्त्रीलाई आचारसंहिता पालना गर्न निर्देशन दिने निर्णय गरेको छ।

प्रधानमन्त्रीलगायत दलका नेता र मन्त्रीसमेतले हेलिकोप्टर सेवा प्रयोग गर्दा लागेको खर्चको व्ययभार सरकारी कोषमा पर्छ/पर्दैन स्पष्ट गरी लेखी पठाउन प्रधानमन्त्री तथा मन्त्रिपरिषद्को कार्यालयलाई निर्देशन दिएको छ।

आयोगका सहायक प्रवक्ता कमल भट्टाराईले जारी गरेको विज्ञप्तिमा निर्वाचन प्रचारप्रसारका सन्दर्भमा हेलिकप्टर तथा अन्य साधनसमेत प्रयोग गर्नु निर्वाचन आचारसंहिताको प्रतिकूल भएको सम्झाइएको छ।