निर्वाचन आयोगले तोक्यो उजुरी दिने माध्यम

काठमाडौं– निर्वाचन आयोगले निर्वाचन आचारसंहिता विपरीत कुनै कार्य भएको पाइए उजुरी दिन चाहने व्यक्तिले मौखिक, लिखित, सामाजिक सञ्जाल, विद्युतीय माध्यम वा अन्य कुनै तरिकाले दिन सकिने बताएको छ। 

उजुरी निर्वाचन आयोग, निर्वाचन अधिकृतको कार्यालय, निर्वाचन कार्यालय वा आचारसंहिताबमोजिमका समिति, टोली वा अनुगमन अधिकृतसमक्ष दिन सकिने व्यवस्था गरिएको छ। साथै, आयोगले सञ्चालन गरेको टोल फ्री नम्बर ११०२ मा फोन गरेर पनि उजुरी दिन सकिनेछ।

आयोगले जारी गरेको निर्वाचन आचारसंहिता, २०७९ बमोजिम उजुरी दिँदा आधार, कारण र सोसम्बन्धी कुनै प्रमाण भए सोसमेत संलग्न गरी दिनुपर्नेछ। कसैले आचारसंहिता उल्लंघन गरे मौखिक वा विद्युतीय माध्यमबाट समेत उजुरी दिन सकिनेछ। यसरी उजुरी दिइएकामा सम्बन्धित निकाय वा अधिकारीले सोको अभिलेख राखी आवश्यक कारबाही प्रक्रिया अघि बढाउनुपर्नेछ।

उजुरीकर्ताले आफ्नो नाम नामेशीसहितको विवरण प्रकाशन गर्न नचाहे सार्वजनिक गरिने छैन। कसैले यो आचारसंहिता उल्लंघन गरे आयोगले आयोग ऐन, २०७३ को दफा २३ बमोजिम १ लाख रुपैयाँसम्म जरिमाना गर्न वा उम्मेदवारी रद्द गर्न सक्नेछ।

आचारसंहिता अनुगमनका लागि केन्द्रमा एक आयुक्तको संयोजकत्वमा केन्द्रीय आचारसंहिता अनुगमन समिति र जिल्लास्तरमा मुख्य निर्वाचन अधिकृतको संयोजकत्वमा जिल्ला आचारसंहिता अनुगमन समिति गठन गरिएको छ।