सहकारी प्रमुखमाथि गोली प्रहारको आरोपमा ३ भारतीयसहित ४ जना पक्राउ

सर्लाही- सर्लाहीको बागमती नगरपालिका-१ मिलनचोकस्थित सगुन बचत तथा ऋण सहकारी संस्थाका सेवाकेन्द्र प्रमुखमाथि गोली प्रहार गरेको आरोपमा चार जना पक्राउ परेका छन्। पक्राउ पर्नेमा तीनजना भारतीय नागरिक छन्। 

रकम लुटपाट गर्न सहकारी पुगेका उनीहरूले प्रमुखमाथि गोली प्रहार गरी भारतीय नम्बरको मोटरसाइकलमा भागेका थिए। तीन जनालाई प्रहरीले नेपाल–भारत सीमाबाट बुधबार राति नियन्त्रणमा लिएको हो।

पक्राउ पर्नेमा भारतको बिहार राज्यका १९ वर्षीय आलोक सिंह, १९ वर्षीय सौरभकुमार यादव र १९ वर्षीय गुलसन कुमार सिंह छन्। घटनाको मुख्य योजनाकार एवं सहयोगी सर्लाहीको धनकौल गाउँपालिका–१ का ३२ वर्षीय डिजे भन्ने धीरेन्द्र सहनीलाई पनि प्रहरीले नियन्त्रणमा लिएको छ।

लुटेराको गोली प्रहारबाट केन्द्रका प्रमुख लालबन्दी नगरपालिका–२ जुटपानीका ३० वर्षीय साजन कार्कीले प्रतिकार गरेपछि उनीमाथि गोली प्रहार भएको थियो। गोली कार्कीको दाहिने पाखुरा, दाहिने कोखा, बायाँ कोखा र दाहिने तिघ्रामा गोली लागेको छ। गोली लागेर घाइते भएका कार्कीको काठमाडौंमा उपचार चलिरहेको छ। उनी खतरामुक्त रहेको उपचारमा संलग्न चिकित्सकले बताएका छन्।