अमेरिकाले गाँजासँग सम्बन्धित सामान्य संघीय अपराधमा माफी दिने

काठमाडौं- अमेरिकी राष्ट्रपति जो बाइडेनले गाँजासँग सम्बन्धित सामान्य संघीय अपराधमा माफी दिने घोषणा गरेका छन्।

बाइडेनले बिहीबार भिडियो सन्देश जारी गर्दै देशको संघीय कारागारमा गाँजा सेवन र राख्ने आरोपमा थुनिएका सबैलाई रिहा गर्ने घोषणा गरेका हुन्।

यसअघि राष्ट्रपति चुनावको प्रचारप्रसारका क्रममा उनले उक्त निर्णय गर्ने प्रतिबद्धता व्यक्त गरेका थिए। उनको यो घोषणाले गाँजासम्बन्धी संघीय अपराधमा सजाय भोगिरहेका हजारौं अमेरिकी लाभान्वित हुनेछन्।

बाइडेनले गाँजा सेवन गरेको कसुरमा मात्रै कसैलाई जेल हाल्नु उचित नहुने बताएका छन्। ‘गाँजा राखेकै कसुरमा जेलमा परेर कैयौंको जीवन बर्बाद भएको छ। गाँजा कब्जामा लिएको फौजदारी अभियोगका कारण मानिसले रोजगारी, घर र शिक्षाको अवसर पाउन सकेका छैनन्,’ उनले भने।

उनले गोरा र काला मानिसहरूले समान मात्रामा गाँजा प्रयोग गरे पनि काला मानिसलाई गोराहरू भन्दा बढी पक्राउ गरिने र सजाय दिइने अभ्यासको पनि विरोध गरेका छन्।

डिपार्टमेन्ट अफ हेल्थ एण्ड ह्युमन सर्भिस र महान्यायाधिवक्ता मेरिक गारल्याण्डलाई संघीय कानुन अन्तर्गत गाँजा कसरी अनुसूचित गरिएको छ भनेर तत्काल समीक्षा गर्न जिम्मेवारी दिने बाइडेनले निर्णय गरेका छन्। अहिले अमेरिकामा गाँजालाई लागुऔषध हेरोइनकै श्रेणीमा वर्गीकरण गरिएको छ।