मार्चमा पाकिस्तानको मुद्रास्फीति ५० वर्ष यताकै सबैभन्दा उच्च

इस्लामावाद- सन् १९६५ को जुलाईपछि गएको मार्च महिनामा दक्षिण एसियाली मुलुक पाकिस्तानको मुद्रास्फीति पहिलो पटक सबैभन्दा उच्च मापन गरिएको छ। 

मुद्रास्फीतिको जारी प्रवृत्ति कम्तिमा आगामी दुई महिनासम्म जारी रहने र जूनदेखि घट्ने अनुमान विज्ञहरूको छ। मुद्रास्फीति गत बर्षको मार्चमा भन्दा ३५.४ प्रतिशतले बढेको गत शनिबार सार्वजनिक सरकारी तथ्यांकले देखाएको छ।

उपभोक्ता मूल्य सूचकांक (सीपीआई) ले मापन गरेको पाकिस्तानको मुद्रास्फीति गत वर्षको सोही महिनाको तुलनामा मार्चसम्ममा अत्यधिक बढेको हो। मार्च २०२२ मा मुद्रास्फीति १२.७ प्रतिशत रहेको पाकिस्तान तथ्यांक ब्यूरो (पीबीएस) का मोहम्मद मजहरले बताए।

पीबीएसका अनुसार मासिक आधारमा उपभोक्ता मूल्य सूचकांक मार्चमा ३.७ प्रतिशत बढेको छ। फेब्रुअरीमा उपभोक्ता मूल्य सूचकांकमा ४.३ प्रतिशतको वृद्धि भएको थियो। 

कोभिड–१९ का कारण थला परेको विश्व अर्थतन्त्र र रूसले युक्रेनमा गत बर्षदेखि सुरू गरेको युद्धका कारण पाकिस्तानलगायत विश्वका धेरै मुलुकको मुद्रास्फीतिका लागि जिम्मेवार रहेको मान्ने गरिएको छ।  -एएनआई