बलात्कार आरोपित सन्दीप आज नेपाल आइपुग्दै, विमानस्थलबाटै प्रहरीले नियन्त्रणमा लिने

काठमाडौं- बलात्कारको आरोप लागेका क्रिकेटर सन्दीप लामिछाने आज बिहीबार बिहान १० बजे नेपाल आइपुग्ने भएका छन्। कतार एयरवेजको उडानबाट आफू स्वदेश फर्किन लागेको उनले आफ्नो फेसबुक स्टाटसमा लेखेका छन्।

उनले त्रिभुवन विमानस्थलमा नै प्रहरीसमक्ष आत्मसमर्पण गर्ने बताएका छन्। आफूमाथि गलत आरोप लागेको उल्लेख गर्दै उनले छानबिनमा सहयोग गर्ने उल्लेख गरेका छन्। आरोपित लामिछानेले आफू विमानस्थलमा उत्रिँदा आफ्ना वकिल सरोजकृष्ण घिमिरेलाई पनि उपस्थित गराइदिन प्रहरीलाई यसअघि नै अनुरोध गरेका थिए।

१७ वर्षीया एक नाबलिग किशोरीले गत भदौ २१ गते लामिछानेविरुद्ध जबर्जस्ती करणी गरेको भन्दै गौशाला प्रहरी वृत्तमा जाहेरी दिएकी थिइन्। त्यसको भोलिपल्टबाट प्रहरीले जाहेरी दर्ता गरेर अनुसन्धान सुरु गरेको थियो।

गत भदौ ५ गते साँझ लामिछानेले आफूलाई नगरकोट लगेको र त्यही रात फर्किएर गौशालाको एक होटलमा ल्याई जबर्जस्ती करणी गरेको आरोप जाहेरीमा लगाइएको छ।

जाहेरीमा उल्लेख गरेका केही विषय उद्धृत गर्दै प्रहीले जारी गरेको विज्ञप्तिमा लामिछानेले किशोरीलाई भदौ ५ मा काठमाडौं र भक्तपुरका विभिन्न स्थानमा लगी पुनः त्यही रात ११ः५५ मिनेटमा गौशालाको एक होटलमा ल्याई पटकपटक जबर्जस्ती करणी गरेको उल्लेख छ । दुवै जना भोलिपल्ट बिहान पौने ७ बजेतिर होटलबाट बाहिरिएका थिए। जाहेरीमा किशोरीले आफूले लामिछानेसँग स्न्याप च्याटमार्फत एक प्रशंसकका रूपमा कुराकानी गर्ने गरेको र त्यसकै आधारमा भेट्न बोलाएर होटलमा लगी बलात्कार गरेको बताएकी छन्।

जाहेरीलगत्तै प्रहरीले घटनास्थल (होटल) पुगेर सीसीटीभी फुटेज निकाल्नुका साथै होटल सञ्चालकसँग पनि सोधपुछ गरिसकेको छ। प्रहरीले पीडितलाई ‘एकद्वार संकट व्यवस्थापन केन्द्र’मा विस्तृत स्वास्थ्य परीक्षण गराएको छ।

उक्त घटनापछि लामिछाने नेपाली टोलीको नेतृत्व गर्दै केन्याविरुद्ध ट्वान्टी–२० अन्तर्राष्ट्रिय शृंखला खेल्न भदौ ६ गते नैरोबी प्रस्थान गरेका थिए। उनी त्यतैबाट सीपीएल खेल्न वेस्ट इन्डिज गए। उनी उतै हुँदा यहाँ उजुरी परेपछि उनी कानुनी प्रबन्ध मिलाउनका लागि उतै बसेर आजमात्र फर्किन लागेका हुन्।

प्रहरीले लामिछानेविरुद्ध मुलुकी अपराध संहिता २०७४ अनुसार अनुसन्धान सुरु गरेको छ । संहिताको दफा २१९ मा ‘कसैले कुनै महिलालाई निजको मञ्जुरी नलिई करणी गरेमा वा मञ्जुरी लिएर भए पनि १८ वर्षभन्दा कम उमेरको कुनै बालिकालाई करणी गरेमा निजले त्यस्तो महिला वा बालिकालाई जबर्जस्ती करणी गरेको मानिनेछ’ उल्लेख छ। संहितामा १६ देखि १८ वर्ष उमेरको नाबालिग किशोरीलाई जबर्जस्ती करणी गरेको पुष्टि भएमा १० वर्षदेखि १२ वर्षसम्म कैद सजाय हुने उल्लेख छ।