नारायणीमा पानीको बहाव सतर्कताको तहभन्दा माथि

काठमाडौं- नारायणी नदीमा आएको बाढीले सतर्कताको तह पार गरेको छ। जल तथा मौसम विज्ञान विभाग, बाढी सूचना केन्द्रको आज बिहान ७ः३० बजेको तथ्यांकअनुसार नारायणगढ र  देवघाट बाढी मापन केन्द्रमा जल सतहले सतर्कताको तह पार गरेको हो।

अविरल वर्षाका कारण नारायणगढमा बिहान ७ बजे पानीको सतह १०.६१ मिटर पुगेको छ। ९.८ मिटर पुगेपछि सतर्कता तह पार हुन्छ। नारायणगढ क्षेत्रमा बिहान ६ बजे नै पानीको सतह ९.८ मिटर पुगेको थियो। ११ मिटर पुगेपछि खतराको संकेत मानिन्छ।

देवघाट मापन केन्द्रमा पनि पानीको बहाव ७.४ मिटर पुगेको छ। ७(३ मिटर पुगेपछि सतर्कता तह पार हुन्छ। देवघाटमा ९ मिटर पानीको बहाव पुगेपछि खतराको संकेत मानिन्छ।

नारायणीमा पानीको बहाव आज यस वर्षकै उच्च रहेको चितवन जिल्ला प्रशासन कार्यालयले जानकारी दिएको छ। अहिले पनि पानी निरन्तर परिरहेकाले बाढीको सतह बढ्ने क्रममा छ। नारायणीमा बहाव बढेपछि पश्चिम चितवनका नदी तटीय क्षेत्र जोखिममा परेका छन्।

चितवन र नवलपरासीका तटीय क्षेत्रमा हुनेले आज साँझसम्म उच्च सतर्कता साथ सुरक्षित स्थानमा रहन उक्त केन्द्रले जनाएको छ। चितवन, नवलपरासीलगायत जिल्लामा रातभर पानी परेकाले नारायणी तटीय क्षेत्रका बासिन्दालाई सचेत रहन जिल्ला प्रशासन कार्यालयले आग्रह गरेको छ। जिल्लाका सबै सुरक्षा निकायलाई ‘अलर्ट’ रहन निर्देशन दिइएको छ।