हाई-प्रोफाइलको गुमनाम हत्या : अनुसन्धान चुनौतीपूर्ण

काठमाडौं- पूर्वराजदूत केशव झाको हत्याबारे महानगरीय प्रहरी अपराध महाशाखाले सुक्ष्म अनुसन्धान अगाडि बढाएको छ । उनको गत सोमबार बिहान धारिलो हतियार प्रहार गरी हत्या गरिएको थियो ।

घटना रहस्यमय भएकाले गहिरो अनुसन्धान थालिएको महाशाखाले जनाएको छ । त्यसका लागि महाशाखाका एसएसपी धीरजप्रताप सिंहको नेतृत्वमा प्रहरीले घटनास्थलको पुनः जाँच थालेको हो ।

कसरी भयो हत्या ?

८३ वर्षीय झा फ्रान्सका लागि पूर्वराजदूत हुन् । अमेरिका र जर्मनीमा समेत कूटनीतिज्ञ रहेर काम गरेका थिए । अवकाशको समय उनी विभिन्न सामाजिक गतिविधिमा संलग्न थिए ।

फलफूलका पारखी उनी नियमित फलफूल खान्थे । र, घरमा आउने  पाहुनालाई पनि फलफूलबाटै स्वागत गर्थे । फलफूल काट्न प्रयोग हुने चक्कु निकै धारिलो हुने गरेको उनका सहकर्मी युवराज अधिकारी बताउँछन् । धारिलो चक्कु उनले आफू सुत्ने ओछ्यानको सिरानी मुनि राख्थे ।

अधिकारीले नियमित भेटघाटमा यस्तो धारिलो चक्कु ओछ्यानमै राख्न नहुने बताउँदै झालाई सम्झाउँथे । उनले भने कुनै फरक नपर्ने बताउँदै टार्ने गर्थे । सोही चक्कु उनको हत्यामा प्रयोग भएको छ । र, हत्याराले रगत लतपतिएको चक्कु छातिमा राखेर हिँडेका छन् ।
 

पूर्वराजदूत केशव झाको रहस्यमय हत्याकाण्डमा मिहिन अनुसन्धान गर्दै प्रहरी ।

चारैतिर कम्पाउन्ड रहेको झाको घर दक्षिणपूर्व फर्किएको छ । र, एउटा मात्र गेट छ । सोही गेटमा सुरक्षा गार्ड र घरको सहयोगी रहेका कान्छा तामाङ बस्दै आएका छन् ।

चारैतिरबाट बन्द झाको घरको माथिल्लो तलाको झ्याल काटिएको छ । त्यहींबाट हत्यारा घरभित्र पसेकोजस्तो देखिन्छ । तर, त्यसका लागि उनकी पत्नी ज्ञानुको कोठा हुँदै मात्र झा सुत्ने तल्लो तलामा पुग्न सकिन्छ । अन्यत्रबाट भित्र पस्ने सबै ढोका बन्द थिए । 

झा कुकर पाल्न सोखिन थिए । उनको घरमा भएको जापानिज जातको कुकुर पाहुना आउँदा ठूलो स्वरमा भुक्ने गथ्र्यो । तर, हालसम्म कसैलाई टोकेको छैन ।

झाको हत्या भएको रात कुकुरले कुनै प्रतिक्रिया नदिनु थप रहस्यमय भएकाले प्रहरीले घटनाको अनुसन्धान घर भित्रैबाट शुरु गरेको छ । अपराध महाशाखाले पत्नी ज्ञानु झा, उनका सहयोगी कान्छा तामाङ र मालीको काम गर्ने दुई जनासँग बयान लिइरहेको छ ।

झा ७५ वर्षीया पत्नी ज्ञानु र सहयोगी रहेका काभ्रे बनेपाका ४८ वर्षीय कान्छा तामाङसहित बस्दै आएका थिए ।

श्रीमतीसहित राति १० बजेको समाचार हेरेर भुईं तलामा सुतेका थिए, झा । बिहान रगतले लतपतिएको अवस्थामा मृत फेला परेका थिए । बबरमहलस्थित झाको निवास दुई तलाको छ । लामो समयदेखि श्रीमती पहिलो तलामा र श्रीमान् भुईं तलामा सुत्थे ।

सहयोगी तामाङ गेटसँगैको सानो कोठामा सुत्थे । सधैंझै नियमित खाना खाई टीभी हेरेपछि आ–आफ्नै कोठामा सुतेका उनीहरू यति ठूलो घटना हुँदा पनि अनभिज्ञ हुनुलाई प्रहरीले रहस्यमय मानेको छ । उनीहरू र कुकुरलाई बेहोस बनाएर झाको हत्या भएको हुन सक्ने पाटोमा प्रहरीले अनुसन्धान गरिरहेको छ ।

शिक्षित परिवारभित्रको गुमनाम हत्या

पूर्वराजदूत झाको परिवार आफैंमा शिक्षित परिवार हो । झा राजनीतिशास्त्रमा स्नातकोत्तर हुन् भने श्रीमतीले स्नातकसम्म गरेकी छन् । एक छोरा र एक छोरी दुवै डाक्टर हुन् ।

काठमाडौंको नरदेवीमा उनीहरूको पुख्र्यौली घर छ । यो परिवार सुरक्षाको विषयमा त्यति अनभिज्ञ पनि थिएन । एउटा हाई–प्रोफाइल परिवारमा भएको गुमनाम हत्याको छानविन प्रहरीका लागि थप चुनौती बनेको छ ।

झा परिवार आर्थिक रूपमा सम्पन्न पनि हो । पूर्वराजदूत झा हत्याको अघिल्लो दिनसम्म पनि सक्रिय जीवनमा थिए । उनका छोरा आयरल्यान्ड र छोरी पूर्वी टिमोरस्थित राष्ट्रसंघीय नियोगमा कार्यरत छन् ।

झा परिवारले केही दिनअघि बुढानीलकण्ठमा रहेको आफ्नो जग्गा बिक्री गरेको थियो । त्यसवापत आएको पैसा लुट्ने उद्देश्यका साथ हत्या भएको शंका पनि प्रहरीको छ । तर, झाको घरबाट कुनै सामान लुटिएको छैन । कम्पाउन्डबाट प्रहरीले बरामद गरेको प्लास्टिकको पञ्जाले घटना निकै योजनाबद्ध भएको देखाएको छ ।