निर्मला हत्या प्रक्ररणः बम दिदीबहिनी पक्राउ

कञ्चनपुर- निर्मला हत्याकाण्डमा सूत्रका रुपमा हेरिएका बम दिदीबहिनीलाई प्रहरीले पक्राउ गरेको छ । रोशनी बम र अनिता बमलाई शनिबार बिहान पक्राउ गरिएको जिल्ला प्रहरी प्रमुख प्रहरी उपरीक्षक कुबेर कठायतले जानकारी दिए ।

उनले दिदी बहिनी पक्राउ गरि अनुसन्धान सुरु भएको बताए । उनीहरुको घर सिल गरी अनुसन्धान गर्ने तयारीमा पनि प्रहरी रहेको बताइएको छ । साउन १० गते निर्मला पढ्न भनेर उनीहरुको घर गएपछि फेरि देखिएकी थिइनन् । आन्दोलनकारीको मुख्य माग उनीहरुको गिरफ्तारी र अनुसन्धान नयाँ सिराबाट गर्नुपर्ने रहेको छ । 

गत साउन १२ गते १३ वर्षीया वालिका निर्मला पन्तको बलात्कार पछि हत्या भएको थियो । भीमदत्तनगरपालिका–१८ निम्बुखेडास्थित उखुबारीमा हत्या गरी फालिएको अवस्थामा निर्मलाको शव भेटिएको थियो ।