काँग्रेस केन्द्रीय समिति बैठक आज : यस्ता छन् छलफलका एजेन्डा

काठमाडौँ- प्रमुख प्रतिपक्षी दल नेपाली काँग्रेसको केन्द्रीय कार्यसमितिको बैठक आज शनिबार बस्दैछ । 

हिजो शुक्रबारका लागि नै बैठक डाकिए पनि पार्टीको महासमिति बैठकको तयारी र अन्य समिति गठन सम्बन्धमा शीर्ष नेताहरुबीच दिनभर आन्तरिक छलफल हुँदा आज मात्रै बैठक आजका लागि सारिएको हो । सभापति शेरबहादुर देउवा, वरिष्ठ नेता रामचन्द्र पौडेललगायत शीर्षनेताहरुबीचको छलफल र सहमतिपछि बैठक आज बिहान ११ बजे बस्न लागेको हो । 

पार्टीका विभिन्न समितिको गठन र महासमिति बैठकको तयारीका सम्बन्धमा शीर्षनेताहरुबीच सल्लाह गरी टुङ्गो लगाएर मात्र बैठक बस्ने सहमति भएपछि बैठक बस्न लागेको केन्द्रीय सदस्य दिलेन्द्रप्रसाद बडूले जानकारी दिए । 

शीर्ष नेताहरुबीच शुक्रबार भएको छलफलमा विशेषगरी महासमिति बैठकको स्थान र मिति, कार्यसम्पादन तथा अनुशासन समिति गठनका सम्बन्धमा नेताहरुबीच छलफल भएको उनले बताए ।

गत वैशाख १६ गते सम्पन्न काँग्रेस केन्द्रीय कार्यसमितिको बैठकले यही भदौ महिनामा महासमितिको बैठक आयोजना गर्ने निर्णय गरेको थियो । उक्त बैठकले स्थानीय, प्रदेश तथा केन्द्रीय तहमा भएको राज्य पुनः संरचनाअनुसार पार्टीको पुनः संरचना गर्न पार्टीको विधानमा समयानुकूल परिमार्जनका लागि विधान संशोधन मस्यौदा समिति बनाउने निर्णय पनि गरेको थियो । 

सोही निर्णयअनुसार बिहीबार काँग्रेसले महामन्त्री पूर्णबहादुर खड्काको संयोजकत्वमा ११ सदस्यीय विधान संशोधन मस्यौदा समिति गठन गरेको थियो । मस्यौदा समितिमा काँग्रेसका जिल्ला सभापतिहरुले पनि सहभागिता खोजेपछि शीर्षनेताहरुले त्यसलाई सम्बोधन गर्ने सम्बन्धमा पनि छलफल गरेको उनले जानकारी दिए ।  

आजबाट सुरुहुने केन्द्रिय समितिको बैठकमा महासमिति बैठककै विषयमा छलफल हुने पनि नेता बडूले जानकारी दिए । महासमिति बैठकको मिति र स्थान तय गर्ने गरि ठोस छलफल हुने उनले बताए ।  पार्टीलाई शसक्त बनाउन र जनस्तरसम्म पुग्नका लागि लिइने रणनीतिका विषयमा पनि बैठकमा छलफल हुने उनको भनाइ छ।