महेन्द्रनगर घटना : प्रहरीको गोलीले १४ वर्षे किशोरको मृत्यु, नौ घाइते

धनजगढी-निर्मला पन्तको हत्यामा संलग्नलाई कारबाहीको माग गर्दै महेन्द्रनगरमा जारी आन्दोलनमा शुक्रबार प्रहरीको गोली लागेर एक जनाको ज्यान गएको छ । 

प्रहरीले चलाएको गोली लागेर भिमदत्त नगरपालिका-१८ भगतपुरका १७ बर्षीय शनि खुनाको ज्यान गएको प्रहरीले जनाएको छ । प्रहरीले चलाएको गोली खुनाको छातीमा लागेको छ । अस्पताल लगिएपछि उनको मृत्यु भएपछि शवलाई प्रदर्शनकारीले जिल्ला प्रशासन कार्यालय अगाडि लगेर राखेका छन् । अस्पतालमा उपचारका क्रममा मृत्यु भएका खुनाको शवलाई स्टेचरमा हालेर बजार परिक्रमा गराउँदै जिल्ला प्रशासन कार्यालय अगाडी राखेको आन्दोलनकारीले बताएका छन् । प्रहरीले शव बेलुकीपख अस्पतालमा पुर्‍याएको छ । 

घट्नामा घाइते हुनेको संख्या धेरै भएको दाबी गरिएपनि गोली लागि घाइते भएका नौ जनामात्र अस्पतालमा आइपुगेको महाकाली अंचल अस्पतालले जानकारी दिएको छ । गोली लागेर घाईते हुनेमा मृतक खुनाका दाजु उमेश खुना, चेतन भट्ट, युवराज भट्ट, किशोर भट्ट, मनोज खड्का, सुरेश चतौट, दामोदर खत्री, कविन्द्र सिंह र उमेश देउवा रहेका छन् । उनीहरु सबैको धनगढीस्थित सेती अञ्चल अस्पतालमा उपचार भइरहेको छ । 

घटना बारे अनुसन्धान गर्न महेन्द्रनगर पुगेको टोलीलाई सत्यतथ्य छानविन गर्न दबाब दिने उद्देश्यले बेलुकीपख निकालिएको खबरदारी जुलुसमा प्रहरीले गोली हानेको प्रदर्शनकारीको आरोप छ । जिल्ला प्रहरी प्रमुख प्रहरी उपरीक्षक कुवेर कठायतले आन्दोलनले उग्र रुप लिएपछि गोली चलाएको बताए । उनले आन्दोलनकारीले सरकारी वकिल कार्यालयको गाडी तोडफोड गर्नुका साथै ट्राफिक प्रहरीको बिट तोडफोड गरेको बताए । 

जिल्ला प्रशासनमासमेत ढुंगामुडा प्रहार गरेपछि गोली चलाउनु परेको उनले बताए । ‘सुरुमा अश्रुग्यास प्रहार गरियो ढुंगामुडा रोकिएन, हवाईफाएर गरियो रोकिएन अन्तिममा सुरक्षाका लागि गोली प्रहार गर्नुपरेको हो’ कठायतले भने । 

बिहीबार भएको प्रदर्शन हिंसात्मक हुँदा प्रहरीले चलाएको गोली लागेर ६ जना घाइते भएका थिए । त्यसपछि सरकारले कञ्चनपुरका प्रजिअ, एसपी र डीएसपीलाई फिर्ता बोलाएर उनीहरुको स्थानमा काठमाडौँबाट पठाएको थियो । काठमाडौँबाट प्रजिअका रुपमा तारानाथ अधिकारी र एसपीकारुपमा कुबेर कडायत पुगेलगत्तै प्रहरीको गोलीबाट किशोर मारिएका हुन् । शुक्रबारको आन्दोलन कसैको नियन्त्रणमा नरहेको बुझिएको छ । 

‘छानविन टोली पुगेलगत्तै सर्वदलिय÷सर्वपक्षिय छलफल बोलाईएको थियो छलफल सुरु हुन नपाउँदै आन्दोलनकारीले ढुंगामुडा प्रहार गरिहाले’ प्रजिअ अधिकारीले भने-‘१८-२० बर्ष उमेरका युवाहरुको हुल थियो आन्दोलन कसैको नियन्त्रणमा थिएन।’ उश्रृङखल समुहले अस्पताल, अदालत, सरकारी वकिल, ट्राफिक प्रहरी, नगरपालिका सबैमा ढुंगामुडा प्रहार भएपछि प्रहरीले गोली चलाएको उनले बताए । 

प्रहरीका अनुसार प्रदर्शनकारीले भीमदत्त नगरपालिकाका मेयर सुरेन्द्र विष्टको घर पनि तोडफोड गरेका छन् । प्रदर्शनले हिंसात्मक रुप लिएपछि मेयरको घरमा आगोसमेत लगाउन खोजिएको थियो । तर तत्कालै प्रहरी पुगेपछि घरमा आगो लगाउन दिए । प्रदर्शनकारीले विष्टको घरमा भने तोडफोड गरेका छन् । प्रदर्शनकारीहरुले भीमदत्त नगरपालिकास्थित जिल्ला ट्राफिक कार्यालयमा तोडफोड गरेका छन् । त्यसैगरी भीमदत्त नगरपालिकाको कार्यालयमा पनि तोडफोड भएको छ । जानकारहरुका अनुसार शुक्रबारको आन्दोलन भीम रावलले दिएको अभिव्यक्तिको परिणाम हो । रावल बिरुद्धसमेत जुलुसमा नाराबाजी भएको थियो । 

अनिश्चितकालिन कर्फ्यू 

कञ्चनपुर सदरमुकाम महेन्द्रनगरमा प्रदर्शन हिंसात्मक बन्दै गएपछि शुक्रबार ८ बजेबाट फेरि अनिश्चितकालीन कर्फ्यू आदेश जारी भएको छ ।
 
महेन्द्रनगर बजार आसपासका क्षेत्रमा अर्को आदेश नभए सम्मका लागि कर्फ्यू लगाइएको हो । शुक्रबार साँझ भएको झडपमा प्रहरीको गोली लागेर भीमदत्त नगरपालिका १८ भगतपुर बस्ने १७ वर्षीय खुनाको मृत्यु भएपछि स्थानीय प्रशासनले कर्फ्यू आदेश जारी गरेको हो । 


महेन्द्रनगरमा फेरि गोली चल्यो : एक किशोरको मृत्यु