प्रभावकारी अनुसन्धानका लागि खबरदारी जुलुस

धनगढी–निर्मला पन्तको घटना बारे अनुसन्धान गर्न महेन्द्रनगर पुगेको टोलीलाई सत्यतथ्य छानविन गर्न दबाब दिने उद्देश्यले आज खबरदारी जुलुस निकालिएको छ ।
 
बजारका बिभिन्न चोकमा टाएर बाल्दै आन्दोलनरत पक्षले जिल्ला प्रशासन कार्यालय भित्र छलफलमा बसिरहेको सरकारी छानविन टोलीलाई खबरदारी गर्न जिल्ला प्रशासन अगाडी नाराबाजी गरेका छन् । 

नेविसंघ सहअध्यक्ष केशवराज जोशीले घट्ना बारे अनुसन्धान गर्न आएको टोलीलाई खबरदारी स्वरुप जुलुस निकालेको बताए । जुलुसमा उल्लेख्य मात्रामा युवाहरुको सहभागिता छ । प्रहरीले भीँड तितरवितर गर्न एक सेल अश्रुग्यास प्राहार गरे पनि प्रहरी उपरीक्षक कुवेर कडायतले थप अश्रुग्यास प्रहार नगर्न निर्देशन दिएपछि रोकिएको थियो । 

घट्ना बारेमा नेकपाका नेता भीम रावलले दिएको अभिव्यक्तिले थप आशंका उब्जाएको भन्दै युवाहरु कसेको नेतृत्व बिना स्वस्फुर्त रुपमा आन्दोलनमा उत्रेका हुन् । उनीहरुले भीम रावल बिरुद्ध नाराबाजीसमेत गरेका थिए । यस्तै अनुसन्धान टोलीलाई खबरदारी गर्दै शुक्रबार बिहान कैलालीको अत्तरीयामा विद्यार्थीले बिरोध जुलुस निकालेका छन् । 

अनुसन्धानका सहयोग गर्न प्रशासनको अपिल

यसैबीच निर्मला हत्याकाण्ड बारे अनुसन्धान गर्न सरकारद्वारा गठित उच्चस्तरिय छानविन समितिलाई अनुसन्धानमा सहयोग गर्न प्रशासनले अपिल गरेको छ । 

जिल्ला प्रशासन कार्यालयले शुक्रबार बिज्ञप्ती प्रकाशित गरी टोलीले कार्यादेश पाए अनुसार आजबाट नै अनुसन्धान सुरु गरिसकेको  जनाउँदै  उक्त घट्नाको बिस्तृत अनुसन्धानमा सबैले संयमताका साथ सहयोग गर्न सबैमा अपिल गरेको हो । सहायक प्रमुख जिल्ला अधिकारी शुरेन्द्र बिष्टले उच्चस्तरिय टोली जिल्लामा पुगेर यतिबेला सुरक्षा निकायसँग छलफलमा रहेको जानकारी दिए ।