कर्मचारीले चलाउँदै प्रदेश-१ का दुई मन्‍त्रालय

इटहरी- प्रदेश सरकार बनेको सात महिना कट्न लाग्दा पनि प्रदेश-१ का दुई मन्त्रालय विभागीय मन्त्रीविहीन छन् । दुवै मन्त्रालय कर्मचारीले चलाउँदै आएका छन् ।

भौतिक पूर्वाधार विकास र भूमिव्यवस्था, कृषि तथा सहकारी मन्त्रालयमा विभागीत मन्त्री छैनन् । भौतिक भौतिक पुर्वाधार विकास मन्त्रालय सचिव सागर राईले चलाइरहेका छन् । यस्तै, भूमिव्यवस्था, कृषि तथा सहकारी मन्त्रालयलाई सचिव हस्तबहादुर बिष्टले हाँकिरहेका छन् ।

विभागीय मन्त्री नहुँदा मुख्यमन्त्रीले नै मन्त्रालय सम्हाल्ने भएकाले गाह्रो भने नभएको भौतिक पूर्वाधारका सचिव राईले बताए । भूमिव्यवस्था, कृषि तथा सहकारी मन्त्रालयका सचिव बिष्टले विभागीय मन्त्री नहुँदा केही असहज भने भएको बताए । तर, मुख्यमन्त्रीले नै मन्त्रालय हेरिरहेकाले खासै समस्या नभएको उनको भनाइ छ ।

प्रदेश–१ का मुख्यमन्त्री हुन्, शेरधन राई । सामाजिक विकास मन्त्रालयमा मन्त्री जीवन घिमिरे छन् । आर्थिक मामिला तथा योजना मन्त्री इन्द्र आङ्बो छन् भने आन्तरिक मामिला तथा कानून मन्त्री हिक्मत कार्की छन् । उद्योग, पर्यटन, वन तथा वातावरण मन्त्रालयको कमान्ड मन्त्री जगदिशप्रसाद कुसियतले सम्हालेका छन् ।