कञ्‍चनपुरमा कर्फ्यु हटाइयो, जनजिवन सामान्य बन्दै 

कञ्चनपुर- कञ्चनपुरमा बिहीबार साँझ ५ बजेदेखि लगाइएको कर्फ्यु शुक्रबार बिहान ५ बजे हटेपछि जनजिवन सामान्य बन्दै गएको छ। 

भीमदत्त नगरपालिका-२ उल्टाखामकी १३ वर्षीया बालिका निर्मला पन्तको बलात्‍कारपछि हत्या भएपछि दोषीलार्इ कारबाहीको माग गर्दै प्रदर्शन चर्किएपछि जिल्ला प्रशासन कार्यालय कञ्चनपुरले कर्फ्यु आदेश जारी गरेको थियो। 

विरोध प्रदर्शनका कारण भीमदत्तनगर बिहीबार दिनभर अशान्त बन्यो। प्रहरीले दर्जनौं सेल अश्रु ग्यास तथा गोली प्रहार गरेपछि ६ जना घाइते भए। 

घटनाको तीन सातापछि प्रहरीले आइतबार भीमदत्तनगरपालिका-१९ बागफाँटाका ४१ वर्षीया दिलीपसिंह विष्टलाई हत्याका अभियुक्त भन्दै सार्वजनिक गरेपछि आन्दोलनले उग्र रुप लिएको थियो।  मानसिक अवस्था कमजोर भएका विष्टलाई हत्यारा भनी सार्वजनिक गरेपछि आन्दोलन झन चर्किएको हो।