न्यायाधीशसँगको अडियो प्रकरण ममाथिको षड्यन्त्र : अधिवक्ता पोखरेल

काठमाडौं– अधिवक्ता रुद्रप्रसाद पोखरेलले न्यायाधीशसँगको आफ्नो अडियो संवादको छानबिन गर्न माग गरेका छन्। काठमाडौं जिल्ला अदालतका न्यायाधीश राजकुमार कोइरालासँग गरेको संवाद सार्वजनिक भएपछि उनले सामाजिक सञ्जालमार्फत छानबिनको माग गरेका हुन्।

न्यायाधीश कोइराला र अधिवक्ता पोखरेलबीच ठगी आरोपित इच्छाराज तामाङलाई धरौटीमा छुटाउन मोलमोलाइ गरिएको भिडियो हिजो मंगलबार सार्वजनिक भएको थियो। 

आज दिउँसो सामाजिक सञ्जालमा स्टाटस लेख्दै पोखरेलले नेपाल बार एसोसिएसन र बार काउन्सिलबाट हुने छानबिनमा सहयोग गर्न आफू तयार रहेको बताएका छन्।

‘हाललाई म नेबाएको सदस्यका हैसियतले कुनै पनि गतिविधिमा सहभागी नहुने गरी मैले स्वयं सदस्यता स्थगन गरेको छु र कानुन व्यवसायीको हैसियतले कुनै पनि मुद्दाको बहस पैरवी तथा परामर्शमा सहभागी नहुने गरी स्वयंलाई निलम्बन गरेको छु। मउपर भएको षड्यन्त्रउपर कानुनी उपचारको खोजीमा छु।’