उडान बन्द गर्ने घोषणाले तनाव, कारबाहीको तयारीमा सरकार

काठमाडौं- बुधबारदेखि उडान सेवा बन्द गर्ने वायुसेवा सञ्चालक संघको घोषणाले उड्डयन क्षेत्रमा तनाव सिर्जना भएको छ। जसरी पनि आफ्नो निर्णय कार्यान्वयन गराउने पक्षमा सरकार अघि बढेको छ भने वायुसेवा प्रदायकहरूले आफूहरूका माग पूरा नहुन्जेलसम्म आन्दोलनका कार्यक्रम फिर्ता नलिने अडान लिएपछि अन्यौल बढेको हो। 

संघले मंगलबार पत्रकार सम्मेलन गर्दै ५ बुँदे माग अघि सारेको छ। यात्रुसेवा शुल्क ल्यान्डिङ, पार्किङ्ग, नेभिगेसनलगायतमा भएको शुल्कवृद्धि र असार ५ गते प्राधिकरणले सूचित गरेको विमानहरूको रात्रिकालीन विश्रामसम्बन्धी निर्देशन फिर्ता लिनुपर्ने हवाइ सेवा प्रदायकका मुख्य माग हुन्।