अमेरिकामा आक्रमणका लागि तालिम दिइरहेको फ्लुकद्वारा स्वीकार

काठमाडौं- एक अमेरिकी महिलाले सिरियामा आतंकवादी समूह आईसीसी (इस्लामिक स्टेट)का सबै महिला स्क्वाड्रनको नेतृत्व गरेको अनि अमेरिकी भूमिमा आक्रमण गर्ने षड्यन्त्रसमेत रचेको स्वीकार गरेकी छन्।

एलिसन फ्लुक-एक्रेन आतंकवादी संगठनलाई सहयोग गरेको आरोपमा पक्राउ परेपछि उनले एक सयभन्दा बढी महिला तथा बालिकालाई तालिम दिएको स्वीकारेकी हुन्।

अमेरिकामा शिक्षिकाका रूपमा कार्यरत एलिसनले सन् २०११ मा देश छोडेकी थिइन्। ४२ वर्षीया फ्लुक सिरियामाभन्दा पहिले  लिब्यामा आतंकवादी संगठनसँग आबद्ध थिइन्। उनलाई कम्तीमा २० वर्षको जेल सजाय सुनाइनेछ।

उनी आईएससँग हुँदा सिरियाको रक्कामा आधारित खतिबा नुसायबाह महिला बटालियनको नेतृत्व गर्थिन्।

उनको मुख्य भूमिका भनेको बटालियनका महिला तथा बालिकालाई ग्रिनेडदेखि एके-४७ सम्मका हतियार, आत्मघाती भेष्टको प्रयोगबारे प्रशिक्षण दिनु थियो।

भर्जिनियाको अदालतमा उनले सो कुरा स्विकार्दा आफूले तालिम मात्र दिएको तर भर्नासम्बन्धी कार्यमा आबद्ध नरहेको बताएकी छन्। समूहभित्र उनलाई उम मोहम्मद अल-अम्रिकीका नामले चिनिन्थ्यो।

एक साक्षीको गवाही अनुसार उनको 'कट्टरपन्थी'को स्तर 'चार्टभन्दा बाहिर'  र एकदेखि १० को मापनमा '११ वा १२' रहेको थियो।

उनले अमेरिकी विश्वविद्यालय र सपिङ मलमा हमला गर्ने योजना बनाएको समेत स्वीकार गरिन्।