वर्षाका कारण विराटनगरको मतगणना प्रभावित

विराटनगर- विराटनगर महानगरपालिकाको मतगणना केही समयका लागि प्रभावित भएको छ। 

बिहान ८ बजेबाट गणना सुरु गर्ने भनिए पनि वर्षाका कारण गणना प्रभावित भएको हो। विराटनगर-७ स्थित आदर्श माविमा मतगणनाको तयारी भइरहे पनि वर्षाले असर पुर्‍याएको मुख्य निर्वाचन अधिकृतको कार्यालय विराटनगरले जनाएको छ। 

वर्षाका कारण गणनास्थलमा दलका प्रतिनिधि आइनपुग्दा केही बेर ढिलो हुने भएको बताइएको छ। विराटनगरको १९ वटा वडामा शुक्रबार भएको मतदानमा ८९ हजार ६ सय ७८ मत खसेको छ। 

विराटनगरमा ४३ हजार २ सय ४६ मत भने नखसेको कार्यालयका सूचना अधिकारी हेमबहादुर बुढाथोकीले जानकारी दिए। 

महानगरमा १ लाख ३३ हजार १ सय ४२ मतदाता रहेका थिए। गणनाका क्रममा अप्रिय घटना हुनसक्ने सम्भावनालाई मध्यनजर गर्दै कार्यालयले मतगणनास्थलको ६ वटा कोठामा सिसिटिभीसहित तारले घेरा बनाएको छ।