टिभी हेर्न नपाएको झोकमा हजुरआमा हत्या

उदयपुर- उदयपुरमा हजुरआमाको घाँटी थिची हत्या गरेको आरोपमा नातिनी पक्राउ परेकी छन्। 

त्रियुगा नगरपालिका १३ बहेडवाकी ६७ वर्षीया सुखनीदेवी चौधरीको घाँटी थिची हत्या गरेको आरोपमा नातिनी २४ वर्षीया ममता चौधरी पक्राउ परेको प्रहरीले जनाएको छ।

आफ्नै  घरमा गत चैत्र २३ गते मृतक सुखनीदेवीको शव शंकास्पद अवस्थामा भेटिएको थियो। जिल्ला प्रहरी कार्यालय उदयपुरका सूचना अधिकारी प्रहरी नायव उपरीक्षक सन्तोष आर्चायका अनुसार प्रहरीले नातिनी ममतालाई पक्राउ गरेर अनुसन्धान थालेको थियो।

मृतको शवको पोष्टमार्टम  बिपी कोइराला स्वास्थ्य विज्ञान प्रतिष्ठान धरानमा गरिएको छ। टेलिभिजन हेर्ने क्रममा हजुरआमा र नातिनीबीच कुराकानी हुँदै जादाँ विवाद उत्पन्न भएपछि नातिनीले घाँटी थिची हत्या गरेको खुलेको प्रहरीले जनाएको छ।

मृतकलाई खाटमा सुताई नातिनी भागेको भन्ने सूचनाका आधारमा अनुसन्धान थालेको प्रहरीले वैशाख १८ गते उनलाई पक्राउ गरेको जनाएको छ।