सुन्दरहरैँचामा एमाले उम्मेदवारको घरनजिक शंकास्पद वस्तु

विराटनगर- मोरङको सुन्दरहरैँचामा नेकपा एमाले उम्मेदवारको घरनजिक शंकास्पद वस्तु फेला परेको छ। बिहीबार बिहान बमजस्तो देखिने शंकास्पद वस्तु भेटिएको प्रहरीले जनाएको छ।

सुन्दरहरैँचा नगरपालिका-११ शुक्रबारेस्थित वडा सदस्यका उम्मेदवार जीवनाथ ढकालको घरनजिक मकैबारीमा टेपले बाँधेर राखेको तार बाहिर निकालिएको अवस्थामा प्रेसर कुकर फेला परेको मोरङ प्रहरीको भनाइ छ। उनी एमालेबाट वडा सदस्यका उम्मेदवार हुन्। 

घटनास्थलमा प्रतिक्रियावादी निर्वाचन बहिस्कार गरौं भन्ने पर्चासमेत भेटिएको छ। पर्चा सोही प्रेसर कुकरमा टेपले  बाँधेर राखिएको प्रहरीको भनाइ छ।

उक्त शंकास्पद वस्तु  कसले राखेको भने खुल्न सकेको छैन। इलाका प्रहरी कार्यालय बेलबारीका इन्स्पेक्टर खगेन्द्र धमला नेतृत्वको टोलीले घटनास्थल सुरक्षित राखेर वरपर मानिस तथा सवारीसाधन आवतजावतमा रोक लगाएको छ। नेपाली सेनाको बम डिस्पोजल टोली घटनास्थलतर्फ जाँदैछ।