आज देशका केही स्थानमा मेघ गर्जनसहित वर्षा हुने

काठमाडौं- देशका केही भूभागमा आज मेघ गर्जन/चट्याङसहित हल्का वर्षाको सम्भावना रहेको छ।

मौसम पूर्वानुमान महाशाखाका अनुसार अहिले देशको पहाडी भूभागमा आंशिकदेखि सामान्य बदली रही बाँकी भूभागमा मौसम सफा रहेको छ।

हाल नेपालमा स्थानीय वायु र भारतको उत्तर प्रदेशदेखि पश्चिम बङ्गालको समथर भूभागसम्म बनेको न्यून चापीय प्रणाली  प्रभाव रहेको महाशाखाले जनाएको छ। 

बिहीबार दिउँसो देशका पहाडी भूभागमा  आंशिकदेखि सामान्य बदली रहनेछ। अन्य भूभागमा आंशिक बदली रहनेछ। पहाडी भू-भागका केही स्थान बाँकी भूभागका थोरै स्थानहरूमा मेघ गर्जन/चट्याङसहित हल्का वर्षाको सम्भावना रहेको महाशाखाले जनाएको छ।

राति प्रदेश १ , मधेश प्रदेश र बागमती प्रदेशका केही स्थानमा र बाँकी प्रदेशका पहाडी भूभागका एक-दुई स्थानमा मेघ गर्जन/चट्याङसहित हल्का वर्षाको सम्भावना रहेको महाशाखाको भनाइ छ। 

यतिबेला काठमाडौं उपत्यका सहित देशका केही स्थानमा वर्षा भइरहेको छ।