२३ वर्षमै वडा सदस्य बनेकी सुनिता ५ वर्षपछि वडाध्यक्षको उम्मेदवार

बेलबारी (मोरङ) - २३ वर्षको उमेरमा बेलबारी-७ को वडा सदस्यमा निर्वाचित भएकी सुनिता चौधरी पाँच वर्षको कार्यकाल पूरा गरी वडाध्यक्षका लागि मैदानमा छन्। ०७४ को स्थानीय तह निर्वाचनमा उनले निकटतम् प्रतिष्पर्धीलाई १२१ मतान्तरले पराजित गरेकी थिइन्। उमेरले आफूभन्दा दोब्बर बढीकी उम्मेदवारलाई पराजित गरेकी थिइन्। 

थारु महिलाबाट पहिलो पटक आफ्नो गाउँ टोलको जनप्रतिनिधि भएकी सुनिता पछि नगरकार्यपालिका सदस्य भइन्। कार्यपालिका सदस्य सुनिताले आफ्ना गाउँ टोलका समस्याहरु बैठकमा लैजाने, समस्या समाधानका लागि पहल गर्ने काम गरिन्। वडाको विकासका लागि आफूले सक्दो काम गरेको उनको भनाई छ। कार्यपालिकामा सबैभन्दा कान्छी उमेरकी सुनितालाई सुरुमा अरुसामु कुराहरु राख्‍न अप्ठ्यारो लाग्‍ने गरे पनि विस्तारै बानी पर्दै गयो। उनले भनिन्,‘५ वर्षको कामको मूल्यांकन र मेरो क्षमता विकासका आधारमा पार्टी कमिटीले वडाध्यक्षमा सिफारिस गरेको छ।’ 

महिलाहरु नेतृत्वमा आउनुपर्छ र महिलाहरुलाई उद्यमशीलतासँग जोड्नुपर्छ भन्‍ने मान्यता राखेकी सुनिताको अवधारण अनुसार टोलमा परिश्रमी सामाजिक महिला समूह गठन गरिएको छ। पछि सो समूह परिश्रमी सामाजिक उद्यमी सहकारी संस्थामा परिणत भयो। १५ जना महिलाबाट सुरु भएको संस्था अहिले २४ सय सदस्य भएका छन्। सुनिता सहकारीको कोषाध्यक्ष हुन्। 

हरेक टोल–टोलमा टोल विकास संस्था स्थापना गरी सहकारीको विस्तारसँगै आफ्नो क्षमता उनले बढाउँदै लगिन्। वडा सदस्यमा निर्वाचित भएदेखि नै सुनिताले आगामी निर्वाचनमा वडाध्यक्ष बन्‍नुपर्छ भन्‍ने लक्ष्य लिइन्। लक्ष्य अनुसार आफ्नो क्षमता विकासलाई बढाउँदै पनि लगिन्। नेतृत्वको दाबी गर्न, लबिङ गर्न, आफ्ना कुराहरु निर्धक्कसँग राख्नका लागि दलित महिला केन्द्र नेपालले सहयोग गरेको उनको भनाई छ। चौधरी भन्छिन्,‘दलित महिला केन्द्रले सञ्चालन गरेको 'सी लिड्स' (उनको नेतृत्व) ले क्षमता विकासमा उल्लेखनिय काम गर्‍यो। म नेतृत्व विकास गर्न चाहन्थेँ, पछि यस्तै खालको तालिम सञ्चालन गरेको थाहा पाएपछि सहभागी भएँ।'

सामान्य परिवारकी सुनिताले प्लस टुसम्मको अध्ययन गरेकी छन्। आफ्नो अध्ययनलाई अघि बढाउन नसकेकी उनले अब टोलको नेतृत्वसँगै अध्ययनलाई पनि अघि बढाउने बताइन्। पाँच वर्ष कार्यपालिका सदस्य भइसकेकी उनले महिला सञ्‍जालमार्फत महिलालाई उद्यमी बनाउन आफूले काम गरेको बताइन्। सबै महिलालाई उद्यमशीलतासँग जोड्ने आफ्नो योजना रहेको उनले सुनाइन्। पछाडि पारिएका महिलाहरुको शिक्षा, स्वास्थ्यका क्षेत्रमा आफूले जनप्रतिनिधिका रुपमा काम गरेको बताइन्। 

बेलबारी नगरकमिटीको सहसचिव समेत भएकी सुनिताले राजनीतिक तथा सामाजिक क्षेत्रमा धेरै छिटो फड्को मारेको स्थानीय कमला खड्का बताउँछन्। सामाजिक रुपमा राम्रो प्रभाव छर्न सकेकी उनी नेतृत्वमा आएको हेर्न मन भएको खड्काले बताइन्। सुनिताले सबैलाई समान रुपमा व्यवहार गर्ने गरेको खड्काले बताइन्। विकासको नेतृत्व युवाले मात्र गर्न सक्ने उनको भनाई छ।