गाजामा इजरायलको हमला

काठमाडौं– इजरायलले मंगलबार गाजामा पुनः हमला गरेको छ। हमासको एक हतियार निर्माण गर्ने ठाउँलाई लक्षित गर्दै लडाकु विमानबाट आक्रमण गरिएको हो।

आक्रमणमा परी कसैलाई चोटपटक नलागेको प्यलेष्टिनी स्वास्थ्य मन्त्रालयले बताएको छ। जमिनबाट हावामा आक्रमण गर्ने क्षेप्यास्त्रको प्रयोग गरी उक्त हवाई हमलाको प्रतिशोध गरेको हमास सशस्त्र शाखाको एजेदिन अल कसम ब्रिगेडले बताएको छ। ‘हामीले गाजाका आकासमा देखिएका ‘जियोनिस्ट’ लडाकु विमानलाई बिहानको ठीक १ः३५ बजे (स्थानीय समय) आक्रमण गर्न सुरु गर्यौ,” विज्ञप्तीमा लेखिएको छ।

महिनौंपछि पहिलो पटक सोमबार गाजाबाट दक्षिण इजरायलमा रकेट प्रहार भएपछि आसपासका क्षेत्र पुनः तनावग्रस्त बनेका हुन्। इजरायलले आफ्नो ‘आइरन डोम इन्टरसेप्टर’ले खसालेको भनिएको रकेटको जिम्मा प्यालेस्टाइनले लिएको छैन।

पछिल्लो तनाव बढे यता कुनै हताहती वा मृत्युको रिपोर्ट नआएको दावी सम्बन्धित निकायहरुले गरेका छन्।