नेपाल र अफगानिस्तानको दुई मैत्रीपूर्ण खेल मे २५ र २९ मा

काठमाडौं- एएफसी एसियन कप २०२३ को छनोट प्रतियोगिताको तयारी अन्तर्गत नेपालले अफगानिस्तानसँग दुई मैत्रीपूर्ण खेल खेल्ने भएका छन्। अखिल नेपाल फुटबल संघ (एन्फा) ले मैत्रीपूर्ण खेलबारे आइतबार जानकारी दिएको हो।

'नेपालले मैत्रीपूर्ण खेलका लागि अफगानिस्तानसँग सम्पर्क गरेका थिए। अफगानिस्तानले आइतबार मैत्रीपूर्ण खेलको पुष्टि गरेको छ,' एन्फाले सूचनामा लेखेको छ।

मैत्रीपूर्ण खेल मे २५ र २९ मा कतारमा हुनेछ। प्रतियोगिताका लागि राष्ट्रिय टोली अहिले बन्द शिविरमा छ।

नेपाल छनोटको समूह ए मा जोर्डन, कुवेत र इन्डोनेसियासँग छ। नेपालको खेल भने जुन ८ मा जोर्डनसँग खेल्नेछ भने जुन ११ मा कुवेतसँग खेल्नेछ। अन्तिम खेल १४ जुनमा इन्डोनेसियासँग हुनेछ। सबै खेल कुवेतमा हुनेछन्।