मासु खाएको विषयमा दुई विद्यार्थी संगठनबीच जेएनयूमा झडप

काठमाडौं- जवाहरलाल नेहरू विश्वविद्यालयमा वाम विद्यार्थी संगठन आइसा र हिन्दू विद्यार्थी संगठन एबीभीपीबीच झडप भएको छ। विश्वविद्यालयको मेसमा मांसाहारी खानालाई लिएर विद्यार्थी संगठनहरूबीच झडप भएको बीबीसीले  जनाएको छ।

वाम विद्यार्थी संगठनहरूका अनुसार एबीभीपी कार्यकर्ताहरूले विश्वविद्यालयको कावेरी होस्टेलको मेसमा मांसाहारी खानाको विरोध गरिरहेका थिए। विद्यार्थी संगठन अल इन्डिया स्टुडेन्ट्स एसोसिएसन (आइसा)ले ट्वीट गर्दै झडपमा एबीभीपी कार्यकर्ताको हमलामा कयौं विद्यार्थी घाइते भएको जनाइएको छ

घटनास्थलमा प्रहरी पनि पुगेको थियो। विद्यार्थी संगठनहरूले प्रहरीमा उजुरी दिएको बताएका छन्। यद्यपी यसबारे प्रहरीले अहिलेसम्म कुनै जानकारी दिएको छैन। 

एबीभीपीले जारी गरेको ट्वीटमा वाम विद्यार्थी संघको आक्रमणमा उनीहरूका कार्यकर्ता रविराज गम्भीर घाइते भएका छन्।

अर्कोतर्फ, जेएनयू विद्यार्थी संघका अध्यक्ष आईसी घोषले ट्विटरमा भिडियो पोस्ट गर्दै एबीभीपीका विद्यार्थीहरूले जेएनयूमा बस्ने विद्यार्थीहरूलाई मांसाहारी खाना खानबाट रोक्न खोजेको दाबी गरेका छन्। उनले छात्रावासको मेस सचिवलाई पनि एबीभीपीले आक्रमण गरेको दाबी गरेकी छन्।

बीबीसीका अनुसार राति १० बजेसम्म युनिभर्सिटीको माहोल तनावपूर्ण बनेको थियो।