इमरान खानविरुद्धको अविश्वास प्रस्तावमा आज मतदान हुँदै

काठमाडौं- पाकिस्तानका प्रधानमन्त्री इमरान खानविरुद्धको अविश्वास प्रस्तावमाथि आज मतदान हुने भएको छ। पाकिस्तानको संसदमा तीन सय ४२ सांसद रहेका छन्। इमरानलाई बहुमतका लागि १ सय ७२ मत आवश्यक पर्ने छ।

विपक्षी दलले प्रधानमन्त्री खानले विश्वासको मत प्राप्त गर्न नसक्ने दाबी गर्दै आएका छन्। अर्थतन्त्रलाई गलत ढंगले व्यवस्थापन गरेको र सुशासन कमजोर पारेको भन्दै प्रधानमन्त्री खानविरुद्ध केही दिनअघि अविश्वासको प्रस्ताव दर्ता भएको थियो।

अविश्वासको प्रस्तावमा पाकिस्तान मुस्लिम लिग–नवाज (पी.एम.एल–एन) र पाकिस्तान पिपुल्स पार्टी (पीपीपी) का एक सय सांसदले हस्ताक्षर गरेका थिए। 

प्रधानमन्त्री खानले सर्वोच्च अदालतको फैसला स्वीकार गर्ने तर आफूलाई सत्ताच्युत गरे विपक्षीको सरकारलाई मान्यता नदिने चेतावनी दिएका थिए।

पाकिस्तानको सर्वोच्च अदालतले बिहीवार प्रधानमन्त्रीको सिफारिसमा राष्ट्रपतिले गरेको संसद् विघटनलाई बदर गरिदिएको थियो।