श्रीलंकाको राजधानी कोलम्बोमा झडप

काठमाडौं- श्रीलंकाको राजधानी कोलम्बोमा प्रदर्शनकारी र सुरक्षाकर्मीबीच झडप भएको छ। आर्थिक संकटको सामना गरिरहेको श्रीलंकामा स्थानीय आक्रोसित बनेका छन्। अवस्थालाई नियन्त्रणमा लिन देशमा संकटकाल घोषणा गरेर कर्फ्यु जारी गरिएको छ।

तर, धेरै सहरमा जनताले कर्फ्यू उल्लंघन गरेका छन् र सडकमा उत्रिएका छन्। राजधानी कोलम्बोमा प्रदर्शनकारी र सुरक्षाकर्मीबीच केही घण्टा झडप भएको अन्तर्राष्ट्रिय सञ्चारमाध्यमहरूमा उल्लेख छ। 

यस्तै क्यान्डी सहरमा प्रहरीले विद्यार्थीमाथि अश्रुग्यास र पानीको फोहोरा प्रहार गरेको छ। क्यान्डी सहरको विश्वविद्यालय नजिकै सयौं प्रदर्शनकारी विद्यार्थीहरूमाथि प्रहरीले अश्रुग्यास र पानीको फोहोरा प्रहार गरेको थियो।

राष्ट्रपति गोताबाया राजापाक्षको निवास नजिक शुक्रबार झडप भएपछि ३६ घण्टाको कर्फ्यू लगाइएको छ। 

श्रीलंकामा सडक, पार्क र समुद्र किनारमा निस्कन प्रतिबन्ध छ। अधिकारीहरूबाट लिखित अनुमति लिएको खण्डमा मात्रै यस्ता स्थानमा जानसक्ने व्यवस्था मिलाइएको छ।

सामाजिक सञ्जाल पनि अस्थायी रूपमा अवरुद्ध गरिएको छ। जारी कर्फ्यू सोमबार साँझ ६ बजेसम्म रहनेछ।

यसैबीच प्रधानमन्त्री महिन्दा राजापाक्षे बाहेक श्रीलंकाका सबै २६ मन्त्रीले सामूहिक राजीनामा दिएका छन्।