श्रीलंका आर्थिक संकट : २६ मन्त्रीद्वारा सामूहिक राजीनामा

काठमाडौं- आर्थिक संकटसँग जुधिरहेको श्रीलंकाका मन्त्रीहरूले सामूहिक राजीनामा दिएका छन्। प्रधानमन्त्री महिन्दा राजापाक्षे बाहेक श्रीलंकाका सबै २६ मन्त्रीले सामूहिक राजीनामा दिएका हुन्।

प्रधानमन्त्री महिन्द राजपक्ष र उनका दाई राष्ट्रपति गोटाबय राजपक्षले भने राजीनामा गरेका छैनन्। यसअघि कर्फ्युको अवज्ञा गर्दै सर्वसाधारणहरूले सडक प्रदर्शन गरेका थिए।

चरम आर्थिक संकटका कारण श्रीलंकाका नागरिकहरू आक्रोसित बन्दै गएका छन्। यसबीच सरकारविरुद्ध सडकमा प्रदर्शन हुन थालेपछि देशभर कर्फ्यु लगाइएको छ।

जनताले कर्फ्युकोसमेत उल्लंघन गर्दै प्रदर्शन गरिरहेका छन्। प्रदर्शन रोक्ने प्रयासमा सडकमा सेना परिचालन गरिएको छ।

श्रीलंका सन् १९४८मा स्वतन्त्र भएयताकै खराब आर्थिक संकटसँग जुझिरहेको छ।

विदेशी मुद्राको अभावले गर्दा श्रीलंका आर्थिक संकटमा छ। राजीनामा गर्नेमा प्रधानमन्त्रीका छोरा पनि छन्।

श्रीलंकामा मानिसहरूलाई सार्वजनिक सडक, पार्क, रेल वा समुद्री तटमा लिखित अनुमतिबिना जानमा रोक लगाइएको छ। केही समयका लागि सामाजिक सञ्जालको पहुँचसमेत अवरोध गरिएको थियो।