इमरान खानविरुद्धको अविश्वास प्रस्तावमाथि आज मतदान हुँदै

काठमाडौं- पाकिस्तानका प्रधानमन्त्री इमरान खानविरुद्धको अविश्वास प्रस्तावमाथि आज मतदान हुने भएको छ। संसदमा पेस भएको अविश्वासको प्रस्तावमाथि आइतबार पाकिस्तानको तल्लो सदन नेसनल एसेम्ब्लीमा मतदान हुने भएको हो।

उनीविरुद्ध ल्याइएको अविश्वासको प्रस्ताव पारित भएमा प्रधानमन्त्री खान स्वतः पदमुक्त हुनेछन्। ३ सय ४२ सदस्य रहेको सदनमा गत साता खानको पाकिस्तान तेहरिक–इ–इन्साफ (पीटीआई) ले बहुमत गुमाएको थियो। 

गठबन्धनका केही सांसद सरकारको विपक्षमा उभिएका थिए। पीटीआईकै सांसदले पनि खानविरुद्ध विद्रोह गरेका थिए। 

आफूविरुद्ध ल्याइएको अविश्वासको प्रस्तावमाथि मतदान हुने एक दिनअघि खानले आफ्ना समर्थकलाई सडकमा उत्रिन आह्वान गरेका छन्। खानमाथि देशमा आर्थिक संकट निम्त्याएको विपक्षीले आरोप लगाउँदै आएका छन्।