आजदेखि सर्वोच्चले पाँच किसिमका मुद्दा मात्रै हेर्ने

काठमाडौं- सर्वोच्च अदालतले माघ १८ गतेसम्म पाँच किसिमका मुद्दा मात्रै हेर्ने जनाएको छ। न्यायाधीशसहित ३१ जनामा कोरोना संक्रमण देखिएपछि सर्वोच्चले बुधबारदेखि​ १४ दिनसम्मका लागि विभिन्न सेवा कटौती गरेको हो। 

अदालतका प्रवक्ता बाबुराम दाहालले जारी गरेको विज्ञप्तिमा न्यायाधीश, मुख्य रजिस्ट्रारसहित अदालतमा कार्यरत ३१ जनामा कोरोना पुष्टि भएको छ। त्यसैले सर्वोच्चले माघ ५ देखि १८ गतेसम्म पाँच किसिमका मात्रै मुद्दा हेर्ने निर्णय गरेको हो।

प्रवक्ता दाहालका अनुसार बन्दी प्रत्यक्षीकरण तथा कोरोना महामारीसँग सम्बन्धित जरुरी प्रकृतिका जीवन र जनस्वास्थ्य तथा सार्वजनिक महत्त्वका मौलिक हकसँग सम्बन्धित मुद्दाको नियमित सुनुवाइ हुनेछ। त्यस्तै मुद्दा फिर्ता, तामेली एवं मिलापत्रसम्बन्धी काम/कारबाही पनि नियमित रूपमा सञ्चालन हुनेछन्। 

सर्वोच्चले मुलुकी फौजदारी कार्यविधि संहिता, २०७४ को दफा ७३, १३७(६) र १५५ बमोजिमका थुनुवाहरूको निवेदन तथा प्रतिवेदनउपर सुनुवाइ जारी राख्ने जनाएको छ। 

यस्तै थुनुवा भएका मुद्दाको सुनुवाइ पनि जारी रहेने छ। हेर्दा हेर्दै र नि.सु.मा रहेका मुद्दाको पनि निरन्तर सुनुवाइ हुने सर्वोच्चले जनाएको छ।