अफगानी नागरिकलाई पठाइएको सहायता सामग्री राष्ट्रसंघीय मिसनलाई हस्तान्तरण

काठमाडौं- अफगानिस्तानी जनताका लागि नेपाल सरकारले पठाएको सहायता सामग्री संयुक्त राष्ट्रसंघलाई हस्तान्तरण गरिएको छ। परराष्ट्र मन्त्रालयकी सहसचिव सेवा लम्सालको नेतृत्वमा आइतबार बिहान अफगानी जनतालाई आवश्यक औषधी, घरायसी सामग्रीहरु र लत्ता कपडा बोकेर नेपाली टोली काबुल प्रस्थान गरेको थियो। 

उक्त सहायता सामग्री काबुलस्थित राष्ट्रसंघको मिसनलाई हस्तान्तरण गरिएको टोलीमा सहभागी नेपाल प्रेस युनियनका कोषाध्यक्ष सरोज अधिकारीले जानकारी दिएका छन्। 

अफगानिस्तानमा अगस्त १५ मा तालिबानले सत्ता कब्जा गरेपछि त्यहाँ आर्थिक तथा मानवीय संकट उत्पन्‍न भएको छ। अफगानिस्तानमा हाल खाद्यान्‍नको अभाव हुनुका साथै लाखौँ बालबालिकालाई कुपोषण हुन थालेको छ। संयुक्त राष्ट्रसंघले नेपाल सरकारलाई अफगानिस्तानमा सहायता सामग्री पठाउन अनुरोध गरेसँगै नेपालमा नेपाल उद्योग वाणिज्य महासंघ, नेपाल चेम्बर अफ कमर्स र नेपाल उद्योग परिसंघ लगायतका निजी क्षेत्रहरुको अग्रसरतामा सहायता सामग्री पठाइएको हो। टोलीमा सरकारी अधिकारी, निजी क्षेत्रका प्रतिनिधिका साथै पत्रकारहरु समेतको सहभागिता रहेको छ। 

टोली अफगानिस्तान प्रस्थान गर्नुअघि त्रिभुवन अन्तर्राष्ट्रिय विमानस्थलमा पत्रकार सम्मेलनमा बोल्दै परराष्ट्र मन्त्री डा. नारायण खड्काले संयुक्त राष्ट्रसंघले दिएको सूची अनुसार औषधी, घरायसी सामग्री र लत्ता कपडाहरु पठाएको बताएका थिए।

परराष्ट्रमन्त्री खड्काले विश्वका जुनकुनै कुनामा रहेका जनतालाई अप्ठ्यारो पर्दा नेपालले मानवीय सहयोग पुर्याउन सामर्थ्य राख्ने बताएका थिए। अफगानिस्तानी जनतालाई सहयोग गरेसँगै नेपालको छवि र प्रतिष्ठा अन्तर्राष्ट्रिय जगतमा बढ्ने विश्वास उनले व्यक्त गरेका थिए।