बैतडीमा थप एक युवकको शव भेटियो

धनगढी- बैतडीमा थप एक युवकको शव फेला परेको छ। जिल्लाको दशरथचन्द नगरपालिका वडा नम्बर ४ का २६ वर्षीय सुरत भुलको शव फेला परेको प्रहरीले जनाएको छ। 

पाटन नगरपालिका-६, हिरापुर नजिक सडकभन्दा ५० मिटर तल भुलको शव फेला परेको ईलाका प्रहरी कार्यालय पाटनका प्रहरी निरीक्षक राजेश शाहीले बताए।

‘उनी दशैंपछि रोजगारीका लागि भारत गएको र जण्डीसको बिरामी रहेको बुझिएको छ’ प्रहरी निरीक्षक राजेश शाहीले भने, ‘भारतबाट घर फर्किदै गर्दा बाटोमा मृत्यु भएको हुनसक्छ। तर, उनको कसरी मृत्यु भयो, उनी कहिले भारतबाट फर्केका हुन् खुलेको छैन।’ उनले भने, ‘शव पोष्टमार्टमका लागि जिल्ला अस्पताल पठाइएको छ हामी अनुसन्धानमा जुटेका छौ।’ 

बुधबार मात्रै सुर्नया गाउँपालिका-६ का डम्बरदत्त अवस्थीको शव जंगलमा फेला परेको थियो। मंसिर १४ गतेदेखि बेपत्ता उनको हत्या गरेको सोही ठाउँका हरिश अवस्थीले स्विकार गरेका थिए।

हिरासतमा रहेका हरिशले दिएको जानकारी अनुसार उनको शव खाल्डोमा गाडिएको अवस्थामा प्रहरीले बरामद गरेको थियो। प्रहरीले उनलाई हिरासतमा राखेर थप अनुसन्धान गरिरहेको जनाएको छ।