प्रधानमन्त्रीको निर्देशनमा वीर अस्पतालका प्रमुखको सरुवा रोकियो

काठमाडौं– कोभिड युनिफाइड अस्पताल (वीर अस्पताल) प्रमुखको जिम्मेवारी दिइएका डा. गुणराज लोहनीको सरुवा रोकिएको छ। 

स्वास्थ्य मन्त्रालय स्रोतका अनुसार प्रधानमन्त्रीको निर्देशनमा मन्त्रीस्तरीय निर्णयबाट लोहनीको सरुवा रोकिएको हो।

स्वास्थ्य तथा जनसंख्यामन्त्री विरोध खतिवडाले क्षेत्राधिकार बाहिर गएर सरुवा गरेको भन्दै सरुवा रद्द भएको हो ।  खतिवडाले सल्लाह नै नगरी डा. लोहनीलाई वीर अस्पतालको कार्यकारी अधिकारीमा नियुक्ति गरेका थिए। उक्त स्थानमा डा. भुपेन्द्रकुमार बस्नेतलाई यथावत् राख्न पनि प्रधानमन्त्रीले निर्देशन दिएका छन्।

डा. लोहनीलाई निर्देशकको जिम्मेवारी दिइएपछि बुधबार केही कर्मचारीले विरोधसमेत गरेका थिए। प्रधानमन्त्री शेरबहादुर देउवाले आफूसँग सल्लाह नै नगरी सरुवाको निर्णय स्वास्थ्यमन्त्रीले गरेको भन्दै तत्काल निर्णय कार्यान्वयन नगराउन निर्देशन दिएको स्रोतले जनाएको छ।

साथै प्रधानमन्त्री देउवाले पछिल्लोपटक गरिएका सबै कर्मचारीको सरुवा रोक्न स्वास्थ्य तथा जनसंख्या मन्त्रालयलाई निर्देशन दिएका छन्। प्रधानमन्त्रीले स्वास्थ्यमन्त्री खतिवडाले दुई दिनअघि गरेका उच्च अधिकारीहरूको सरुवा रोक्न निर्देशन दिएका हुन्।

बुधबार स्वास्थ्यमन्त्री खतिवडाले मन्त्रालयका १२ तहका कर्मचारीसहित झन्डै एक दर्जन उच्च अधिकारीको जिम्मेवारी हेरफेर गरेका थिए। राष्ट्रियसभा सदस्य निर्वाचनको आचारसंहिता लागु भइसकेको बेला सरुवा गरिएको भन्दै विरोध भएको थियो।