नयाँ भेरिएन्ट फैलिएका देशमा भ्रमण नगर्न अध्यागमनको आग्रह

काठमाडौं- अध्यागमन विभागले कोरोनाको नयाँ भेरिएन्ट फैलिएका देशमा अत्यावश्यक नभई भ्रमण नगर्न आग्रह गरेको छ।

नेपालबाट यात्रा गर्ने योजना बनाएका व्यक्तिलाई अत्यावश्यक अवस्थाबाहेक जोखिमयुक्त देशको यात्रा नगर्न विभागले अनुरोध गरेको हो। सरकारको निर्णयअनुसार विभागले अर्को व्यवस्था नभएसम्मका लागि सचेत हुन विज्ञप्तिमार्फत अनुरोध गरेको छ।

ओमिक्रोन भेरिएन्ट देखिएका देश (दक्षिण अफ्रिका, वोत्स्वाना, जिम्बाब्वे, नामिबिया, लेसोथो, इस्वाटिनी, मोजाम्बिक, मलाबी र हङकङ)बाट आउने वा ती देशलाई ट्रान्जिट बनाइ नेपाल आउने यात्रुलाई गएको मङ्सिर १६ देखि नै नेपाल प्रवेशमा रोक लगाइएको छ। यो निर्णय यथावत् राखिएको पनि विभागले जनाएको छ।

विभागले तोकिएका नौ देश र अन्य कोरोनाको उच्च जोखिम भएका देशबाट नेपाल आउने नेपाली नागरिक, कूटनीतिक तथा अफिसियल पासपोर्टबाहेक वा आवासीय भिसा प्राप्त गरेका विदेशी नागरिकको हकमा पनि विशेष व्यवस्था गरेको छ।