बंगलादेशका पूर्व प्रधानन्यायाधीश सिन्हालाई ११ वर्षको जेल सजाय

काठमाडौं– बंगलादेशका पूर्व प्रधानन्यायाधीश सुरेन्द्रकुमार सिन्हालाई एघार वर्षको जेल सजाय सुनाइएको छ। ठगी र सम्पत्ति शुद्धीकरणसम्बन्धी अभियोगमा उनलाई राजधानी ढाकास्थित विशेष अदालतले क्रमशः चार र सात वर्षको सजाय सुनाएको हो। उनले यी दुई मुद्दाको छुट्टाछुट्टै सजाय भोग्नु पर्नेछ।

अदालतका न्यायाधीश शेख नजमुल आलमले उक्त फैसला सुनाएका थिए। पूर्वप्रधानन्यायाधीश सुरेन्द्रकुमार सिन्हा र अन्य सात जनालाई नक्कली कागजात प्रयोग गरेर पहिले फार्मर्स ब्यांक भनिने हाल पद्मा नाम रहेको ब्यांकबाट चार करोड टाका रकम हिनामिना गर्न संलग्न रहेको ठहर गरिएको छ।

उक्त रकम सिन्हाको बैंक खातामा जम्मा गरिएको र अवैध रूपमा विदेश पठाइएको थियो। पूर्वप्रधानन्यायाधीश सिन्हासहित ११ जना अभियुक्तमध्ये ८ जनालाई फरकफरक सजाय सुनाइएको छ।