सवारी ज्यान मुद्दामा सांसद बिन्दिया कार्कीका छोरा कारागार चलान

विराटनगर- सवारी ज्यान मुद्दामा विराटनगर- ५ बरगाछीका २४ वर्षीय रोविन कार्की पुर्पक्षका लागि कारागार चलान भएका छन्। मादक पदार्थ सेवन गरेर कार चलाउँदा एक मजदुरको मृत्यु र अर्का एक गम्भीर घाइते हुने गरी कार दुर्घटना गराएको आरोपमा रविनसिंह कार्की बुधबार पुर्पक्षका लागि कारागार चलान भएका हुन्।

कार्कीविरुद्ध सरकारी वकिलको कार्यालय मोरङले ‘सवारी ज्यान मुद्दा’ मा मोरङ अदालतमा मंगलबार अभियोग दर्ता गराएको थियो। अभियुक्तलाई ३ वर्षदेखि १० वर्षसम्म कैद र ३० हजार रुपैयाँदेखि १ लाख रुपैयाँसम्म जरिवना मागदाबी राखेर अभियोग दर्ता भएको छ। 

गत जेठ २० गते राति प्रदेश सांसद बिन्दिया कार्कीले प्रयोग गर्दै आएको प्रदेश ३–०१–००२ च २१३९ नम्बरको कारले पैदलयात्रीलाई ठक्कर दिँदा ३५ वर्षीय भारतीय नागरिक मुकेश शर्माको मृत्यु भएको थियो भने मोरङको कटहरी गाउँपालिका–२ का २७ वर्षीय राजकुमार राजवंशी गम्भीर घाइते भएका थिए। ठक्कर दिने कार चलाउने रोविन सांसद कार्कीको छोरा हुन्।

मोरङ जिल्ला अदालतका न्यायाधीश सुदर्शन लामिछानेको इजालाशले कार्कीलाई बुधबार पुर्पक्षका लागि थुनामा राख्न आदेश दिएको अदालतका श्रेस्तेदार राजकुमार दाहालले जानकारी दिए।

मृतक र घाइते विराटनगर–४ स्थित न्यु एभरेष्ट स्टील उद्योगका कामदार हुन्। मदिरा सेवन गरेपछि कार्कीले चलाएको कार दुर्घटना भएको थियो। दुर्घटना भएको तीन दिनपछि कार्कीलाई मोरङ प्रहरीले पक्राउ गरेको थियो।