कार दुर्घटनामा त्रिविका सहप्राध्यापक डा शंकर भण्डारीको मृत्यु

बुटवल- रुपन्देहीको चरङ्गेमा भएको सवारी दुर्घटनामा त्रिभूवन विश्वविद्यालयका सहप्राध्यापक डा शंकर भण्डारीको मृत्यु भएको छ। सोही दुर्घटनामा परी एक जना घाइते भएका छन्। गाडीमा थप दुई जना रहे पनि उनीहरुको अवस्था सामान्य छ।

मंगलबार राति करिब ९ बजे भएको दुर्घटनामा तनहुँको छत्रकोट-१ हुँगाका भण्डारीको मृत्यु भएको हो भने सोही स्थान घर भई बुटवल बस्दै आएका थानेश्वर भण्डारी घाइते भएका छन्।

पूर्व-पश्चिम राजमार्गको चरङ्गे चोकबाट २ किलोमिटर उत्तर डा भण्डारी आफैंले चलाएको बा १७ च ६०६६ नम्बरको कार चरङ्गेको मुढाबासमा कल्भर्टबाट तल खसेको प्रदेश ट्राफिक प्रहरी कार्यालय बुटवलका प्रवक्ता डीएसपी डिल्लीनारायण पाण्डेले जानकारी दिए।

मृतक भण्डारी कांग्रेस केन्द्रीय सदस्य चन्द्र भण्डारीका भाइ हुन्। काठमाडौं बस्दै आएका उनी बुवाको वर्ष दिनको कर्मका लागि अघिल्लो हप्ता मात्र बुटवल आएका थिए। उनी त्रिभुवन विश्वविद्यालय खेलकुद निर्देशनालयका निर्देशकसमेत थिए।