बीपी प्रतिष्ठानका उपकुलपति कार्यकक्षमै थुनिए, मापसे परीक्षण गर्न आन्दोलनकारीको माग

विराटनगर– सुनसरीको धरानस्थित बीपी कोइराला स्वास्थ्य विज्ञान प्रतिष्ठानका उपकुलपति प्राडा ज्ञानेन्द्र गिरीलाई आन्दोलनरत चिकित्सक र कर्मचारीहरूले कार्यकक्षमै थुनेका छन्।

उपकुलपति गिरीले आन्दोलनरत समूहलाई वार्तामा मंगलबार वार्तामा बोलाएका थिए। वार्ताका लागि संघर्ष समितिका सहसंयोजक डा. विष्णु पोखरेलको नेतृत्वमा उपकुलपतिको कार्यकक्षमा प्रवेश गर्दा उपकुलपतिले मादक पदार्थ सेवन गरेको पाइएको आन्दोलनकारीहरुले बताएका छन्।

बोली लरबरिएकोले उनी मातेर कार्यकक्षमा आएको आन्दोलनकारीको आरोप छ। उपकुलपति मातेकोले गर्दा वार्ता भाँडिएको अनसनमा रहेका एक जना चिकित्सकले बताए। उपकुलपति गिरी र अरू पदाधिकारीहरूलाई अहिले आन्दोलनकारीहरुले उपकुलपतिको कार्यकक्षमा थुनेर राखेका छन्।

प्रतिष्ठानको बेथिति अन्त्यको लागि आन्दोलनरत संयुक्त संघर्ष समितिले सोमबारदेखि आफ्नो माग सम्वोधन नगरेको भन्दै रिले अनसन सुरु गरेर आन्दोलन अघि बढाइरहेको बेलामा मंगलबार साढे ३ बजे आन्दोलनरत पक्षलाई उपकुलपति प्राडा ज्ञानेन्द्र गिरीको उपस्थितिमा वार्तामा बोलाइएको थियो ।

आन्दोलनकारीहरुले उपकुलपतिको कार्यकक्ष घेरेका छन् भने उपकुलपतिको मापसे परीक्षण गर्नुपर्ने लगायतको माग गर्दै नाराबाजी गरेका छन्।