संविधानसभा सदस्य चौधरीको कोरोनाबाट मृत्यु, पूर्वस्वास्थ्यमन्त्री रामजनम दम्पती अस्पताल भर्ना

धनगढी– धनगढीस्थित नवजीवन अस्पतालमा उपचाररत संविधानसभा सदस्य रबनी चौधरीको मृत्यु भएको छ। चौधरीको आज दिउँसो मृत्यु भएको उनका श्रीमान् मोतीलाल चौधरीले बताए। 

कलेजो र मिर्गौलाको समस्याले ग्रसित उनी शनिबार अस्पताल भर्ना भएकी थिइन्। आज उनको कोरोना परीक्षण गराउँदा रिपोर्ट पोजेटिभ आएको थियो। 

कैलालीको लम्कीचुहा नगरपालिका–६ बाघमारा निवासी ४४ वर्षीया रबनी २०७० सालको संविधानसभा सदस्य हुन् ।

यता, कोरोना संक्रमण भएपछि उपचारका लागि सेती प्रादेशिक अस्पतालमा भर्ना भएका पूर्व स्वास्थ्यमन्त्री रामजनम चौधरी र उनकी पत्नीले सरकारी अस्पतालमा अक्सिजन  नपाएको गुनासो गरेका छन्।

पूर्व स्वास्थ्यमन्त्री चौधरीले आफ्नी धर्मपत्नीको स्वास्थ्य अवस्था जटिल भएपछि अक्सिजनका लागि मेडिकल सुपरिटेन्डेन्ट र व्यवस्थापन समितिसँग अनुरोध गरे पनि अस्पतालमा अक्सिजन उपलब्ध हुन नसकेको बताए। 

‘धेरै ठाउँमा अक्सिजनको खोजी गरेँ तर पाइएन। खोजी गर्दै जाँदा एउटा निजी अस्पतालमा एक थान सिलिण्डर भेटियो र त्यही सिलिण्डर ल्याएर पत्नीलाई अक्सिजन दिइएको छ,’ उनले भने।

उनले आफ्नो अवस्थामा सुधार भइरहेको र श्रीमतीको अवस्था अझै सुधार हुन नसकेको बताए । सेती प्रादेशिक अस्पतालका सूचना अधिकारी दीलिपकुमार श्रेष्ठले अस्पतालमा ६३ जना कोरोना संक्रमितको उपचार भइरहेको बताए। जसमध्ये तीन जना भेन्टिलेटरमा, १७ जना आईसियूमा र ३८ जना अक्सिजन सपोर्टमा छन्।