पर्सामा भेटियो मृत पाटेबाघ, मृत्युको कारण खुलेन

पर्सा - पर्साको ठोरी गाउँपालिका-३, रामनगर नजिकै एउटा वयस्क पाटेबाघ मृत फेला परेको छ। रामनगरको रामबुद्ध सामुदायिक वन क्षेत्रभित्र शनिबार साँझ पाटेबाघ मृत फेला परेको हो।

सामुदायिक वनभित्र गाईबस्तु चराउन गएका स्थानीयवासीले मृत बाघ देखेपछि निर्मल ठोरी मध्यवर्ती उपभोक्ता समितिलाई खबर गरेका थिए। 

मृत बाघलाई शनिबार राति नै चितवन राष्ट्रिय निकुञ्ज प्रशासनले कसरा लगेको निर्मल ठोरी मध्यवर्ती उपभोक्ता समिति अध्यक्ष बालकुमार बस्नेतले जानकारी दिए। बाघको मृत्युको कारण भने खुलिनसकेको उनको भनाइ छ। 

बाघको अवस्था हेर्दा उक्त बाघ पहिलेदेखि नै घाइते भएको हुन सक्ने र सोही कारण मानिसलाई आक्रमण गरेको हुन सक्ने अध्यक्ष बस्नेतले बताए।

सोही सामुदायिक वन क्षेत्रमा गत बिहीबार सोही बाघको आक्रमणमा परी रामनगरका पूर्णबहादुर तामाङ घाइते भएका थिए। 

यस्तै सोही दिन रामनगरका स्थानीयको आधा दर्जन बढी खसीबाख्रा बाघले मारेको थियो।