नवीन्द्रराज जोशीको कोरोना रोकथाम तथा जनचेतना अभियानलाई परिवारद्वारा निरन्तरता

काठमाडौं- स्वर्गीय नवीन्द्रराज जोशीले आफ्नो निर्वाचन क्षेत्रका मतदाताको घरदैलोमा पुगेर कोरोना रोकथाम तथा जनचेतनाका लागि थालेको अभियानलाई परिवारले निरन्तरता दिएको छ। बुधबार उनको परिवारले स्वायम्भूनाथ मन्दिरमा १०८ दीप प्रज्वलन गरी अभियानलाई निरन्तरता दिएको हो।

कोरोना महामारी बढ्दै गएको बेला जोशीले आफ्नो निर्वाचन क्षेत्रका मतदातामाझ विभिन्न स्वास्थ्य सामग्रीसहित घरदैलो अभियान संचालन गरेका थिए। 

मस्तिष्कघातका कारण उनको निधन भएपछि अभियान रोकिएको थियो। उनको निधन भएको महिना दिनपछि धर्मपत्नी सपना जोशीले आफ्नो श्रीमानको असल कार्यलाई निरन्तरता दिने भन्दै अभियान पुनः सुरु गरेको बताइन्। अभियान कुनै राजनीतिक नभएर विशुद्ध समाजसेवा भएको उनको भनाइ छ। 

उनले यसअघि पनि अभियानमा सहभागी भएको भन्दै नवीन्द्रराज जोशीका सपना पूरा गर्न निरन्तरता दिइएको बताइन्। नवीन्द्रराजको राजनीतिक जीवन सफल बनाउन आफ्नो भूमिका रहेको र अब बाँकी जीवन उनका सपना पूरा गर्न समर्पित हुने धर्मपत्नी सपनाको भनाइ छ।

अभियानअन्तर्गत बिहीबार स्वयम्भू मन्दिर आसपासमा १५ सय मास्क तथा स्यानिटाइजर वितरण गरिएको छ। यसअघि स्वर्गीय नेता जोशीको पहलमा कोरोना संक्रमितलाई वीर र त्रिवि शिक्षण अस्पतालमा उपचारको व्यवस्था मिलाइएको थियो।