वर्ष २०७७ : विपद्‍मा ५९२ जनाको मृत्यु, २ अर्बको क्षति

काठमाडौं- गत वर्ष विभिन्न किसिमका विपद्‍मा परी नेपालमा ५ सय ९२ जनाको मृत्यु भएको छ। बुधबार गृह मन्त्रालयले प्रकाशन गरेको विवरणअनुसार गत वर्ष १ सय १ जना अझसम्म बेपत्ता छन्। विपद्‍का घटनामा परी ११६७ जना घाइते भएका छन्।

यसका साथै ३४ सय चौपायाको पनि मृत्यु भएको मन्त्रालयको विवरणमा उल्लेख छ। 

गत वर्ष सबैभन्दा बढी ३ सय १ जनाको पहिरोमा परी  मृत्यु भएको छ। पहिरोपछि ९७ जनाको भने आगलागीका घटनामा परी मृत्यु भएको छ। आगलागीका घटनामा परी सबैभन्दा बढी ३७९ जना घाइते भएका छन्। सबैभन्दा कम हिमपातमा परी १ जनाको मृत्यु भएको छ। 

गत वर्ष आगलागीका २५ सय ८५ घटना भएको मन्त्रालयको विवरणमा उल्लेख छ। यस्तै चट्याङका २४७, सर्पदंशका ५६, जनावर आक्रमणका २४३, बाढीका ९७, पहिरोका ४८९, अविरल वर्षाका ३६० र हावाहुरीका ७९ घटना भएका छन्। 

विपद्‍का घटनाबाट २ अर्बभन्दा बढी आर्थिक क्षति भएको अनुमान मन्त्रालयले गरेको छ।